मकवानपुरमा बन डढेलो दुर्घटना विमाको तयारी

२१ फागुन, हेटौँडा । मकवानपुरमा सामुदायिक वन उपभोक्ता महासंघको समन्वयमा वन डढेलो दुर्घटनामा विमाको तयारी थालिएको छ । सामुदायिक वन उपभोक्ता महासंघ जिल्ला महासंघ,मकवानपुरको आयोजना र सामुदायिक वन उपभोक्ता महासंघ,केन्द्रीय समितिको सहयोगमा हेटौडामा मंगलवार एक दिने वनडढेलो व्यवस्थापन तथा ईन्स्योरेन्स सम्वन्धी अभिमुखीकरण कार्यक्रमको आयोजना गरी यस्तो तयारी थालिएको हो ।
कार्यक्रममा हरियो वन कार्यक्रमका टीम लिडर सुवास देवकोटा, लुम्विनी जनरल ईन्स्योरेन्स हेटौडा शाखा प्रमुख हरीकुमार शर्मा, सुन्दर सामुदायिक वन उपभोक्ता समूहका सल्लाहकार बुद्धिप्रसाद पौडेल,केदारप्रसाद वर्तौलाले सहजीकरण गरेका थिए । 
पछिल्लो समय वनमा डढेलो लाग्दा निभाउन जाने उपभोक्ताहरुको समेत वीमा गर्ने व्यवस्था भएको सो अवसरमा जानकारी गराइएको थियो । हाल कास्की, गोरखा, लमजुङ लगायत ११ जिल्लामा रहेका सामुदायिक वनहरुले लुम्बिनी इन्स्योरेन्समार्फत उपभोक्ताको सामुहिक विमाको काम शुरु गरिरसकेका छन् । मकवानपुर जिल्लामा रहेका सामुदायिक वनहरुले पनि वीमा गर्ने ईच्छा देखाएको चुच्चेखोला सामुदायिक वनका अध्यक्ष अर्जुनप्रसाद दाहालले बताए । वन डढेलो नियन्त्रणमा खटिने उपभोक्तासंगै वन पैदावर संकलनमा खटिएका पदाधिकारी, कर्मचारी र संकलनकर्ताको पनि वीमा गर्नु पर्ने दहालको भनाई थियो । 
सामुदायिक वन उपभोक्ता महासंघकी केन्द्रीय अध्यक्ष भारती पाठकको प्रमुख आतिथ्यता एवम महासंघ, मकवानपुरका अध्यक्ष साधुराम चौलागाईको अध्यक्षतामा कार्यक्रम भएको थियो । कार्यक्रममा सामुदायिक वन उपभोक्ता महासंघ, ३ नम्बर प्रदेशका सदस्य रामहरी चौलागाई, महासंघ मकवानपुरका कोषाध्यक्ष बलराम अधिकारी लगायतले मन्तव्य व्यक्त गरेका थिए । कार्यक्रममा महासंघका पदाधिकारी, विभिन्न सामुदायिक वन समूहका अध्यक्ष एवम संचारकर्मीहरुको सहभागिता रहेको थियो ।