हेटौँडा–७ मा बर्ड फ्लुको पुष्टि, कुखुरा नष्ट गरिने

Google Photo

३० फागुन, हेटौँडा । हेटौँडा–७ नागस्वतिमा पालेको कुखुरामा बर्डफ्लु भएको पुष्टि भएको छ । स्थानीय कुखुरापालक कृषक कुल प्रसाद चौलागाईको खोरमा मरेका कुखुरामा बर्ड फ्लुका जीवाणु फेला परेको पुष्टि भएको हो । 
यसअघि कुखुरा व्यवसायीले कुखुरा बर्ड फ्लुका नभई रानीखेत नामक रोगका कारण मरेको भन्दै पत्रकार सम्मेलन गरेका थिए । चौलागाईको खोरमा रहेका कुखुराको नमुना काठमाडौं परिक्षणका लागि पठाएकोमा बर्ड फ्लुका जीवाणुको पुष्टि भएको भेटनरी अस्पताल तथा पशुसेवा बिज्ञ केन्द्र मकवानपुरले जनाएको छ ।
यता, जिल्ला प्रशासन कार्यालय मकवानपुरले पनि यस क्षेत्रको कुखुराजन्य बस्तु ओसारपसारमा रोक लगाएको छ । जिल्ला प्रशासन कार्यालय मकवानपुरमा बसेको बैठकमा प्रमुख जिल्ला अधिकारी आस्मान तामाङले यस्तो जानकारी दिएका हुन् । 
बैठकपछि प्रशासनका प्रशासकीय अधिकृत गुणराज प्रसाद न्यौपानेद्वारा जारी सूचनामा चौलागाईको कमर्सियल लेयर्स फर्मको चोरैतिर पूर्वमा वडा नम्बर ६ र ७ को सिमाना, पश्चिममा वनदेवी मन्दिर जाने बाटोको पूर्वी सिमाना, उत्तरमा वनदेवी दुग्ध उत्पादक सहकारी संस्था भवनको सिमानाको बाटोर दक्षिणमा अग्राठे मन्दिरको उत्तरी सिमनाभित्रको कुखुरा, अण्डा सुलि समेत अन्यत्र निकासी हुन नपाउने व्यवस्था प्रभावकारी रुपमा कार्यान्वयन गर्ने निर्णय भएको जनाईएको छ । 
यस क्षेत्रका कुखुरा नष्टको तयारी समेत प्रशासनले गरेको छ । केही बर्ष अघि कमाने क्षेत्रमा समेत बर्डफ्लु फेला परेपछि त्यस क्षेत्रको कुखुरा नष्ट गरिएको थियो ।