शिवमको चुनढुंगा ढुवानीमा कडाई, यस्तो छ सहमति

२ चैत, हेटौँडा । शिवमको चुनढुंगा ढुवानीका क्रममा टिपरले ओभरलोड नबोक्ने सहमति भएको छ । मकवानपुरगढी वडा नम्बर २ शिखरकटेरीमा भएको सरोकारवालाहरुको छलफलमा ओभरलोड नबोक्नेसहित ९ बुँदे सहमति भएको हो ।
गाउँपालिकाका अध्यक्ष विदुर हुमागाईको प्रमुख आतिथ्यता एवं वडा अध्यक्ष बखानसिं पाख्रिनको अध्यक्षतामा भएको छलफलमा ओभरलोड नबोक्ने र यसको नियन्त्रणका लागि प्रशासनले निगरानी गर्ने निर्णय भएको छ । छलफलमा चुनढुंगा ढुवानी गर्ने लोड टिपर बाँसपानी सामरी किनार हुँदै खोलाखेत शिखरकटेरी बैकल्पिक सडकबाट सञ्चालनगर्नेर खाली टिपर गैरीभञ्ज्याङ कुर्लेबाट सञ्चालन गर्ने, तिब्र गतिमा टिपर नचलाउने, त्रिपालले छोपेर ढुवानी गर्नुपर्ने, उद्योगले सञ्चालित बाटो मर्मत सम्भार गरी दुर्घटना र भयमुक्त वातावरण बनाउने निर्णय भएको छ ।
त्यसैगरी, चपकी खानीबाट उत्खनन गरिएको चुनढुंगा खोरभञ्ज्याङ हुँदै सुकौरा बाईपासबाट ढुवानी गर्न पहल गर्ने, टिपर सञ्चालन विहान ४ बजेदेखि बेलुका ९ बजेसम्म सञ्चालन गर्ने, शिवम सिमेन्ट लिमिटेडले धुलो, हिलो र धुँवा नियन्त्रण गर्नुपर्ने, शिखरकटेरी रानीखोला हटिया बाईपास निर्माण गर्न शिवम् सिमेन्ट उद्योगले पहल गर्ने, २ नम्बर वडाको खोला नियन्त्रण एवं बस्ति र खयरघारी संरक्षण उद्योगले गर्नुपर्ने निर्णय भएको छ । छलफलमा उपस्थिति सरोकारवालहरुले खानीबाट उत्पन्न समस्या समाधान र जोखिम न्यूनिकरणकासबैले आफ्नो भूमिकालाई प्रभावकारी बनाउने निर्णय भएको वडा अध्यक्ष बखानसिंह पाख्रिनले बताए ।
कार्यक्रममा वडा सदस्य शिवप्रसाद न्यौपाने, रामप्रसाद पुडासैनी, सावित्रि विश्वकर्मा, शिवम्का प्रतिनिधि गजेन्द्र यादव, कान्तिलोकपथ आयोजनाका प्रतिनिधि रिकेश महर्जन, प्रहरी चौकी चौघडाका इन्चार्ज डम्बरबहादुर केसी, ढुवानी व्यवसायी, टोल विकास संस्थाका प्रतिनिधि लगायतको सहभागिता रहेको थियो ।