देशको समृद्धिमा संचारक्षेत्रको भूमिका महत्वपूर्ण : सभामुख तिम्सिना

५ चैत, हेटौँडा । राष्ट्रियसभाका सभामुख गणेशप्रसाद तिम्सिनाले देशको समृद्धिमा संचार क्षेत्रको भूमिका महत्वपूर्ण रहेको बताएका छन् ।

तु खबरको दोस्रो बार्षिकोत्सवको अवसरमा भएको कार्यक्रममा बोल्दै सभामुख तिम्सिनाले देशको हरेक आन्दोलनमा सञ्चारमाध्यमले खेलेको भुमिका प्रशंसनीय रहेको भन्दै समृद्धिका लागि पनि संचारजगतको भुमिका महत्वपूर्ण रहेको बताए । उनले नयाँ विधेयकले संचार क्षेत्रलाई नियन्त्रण भन्दा पनि व्यवस्थित गर्न खोजेको बताउँदै यसलाई सरोकारवालासंगको छलफलबाट अघि बढाउने बताए । उनले संचार क्षेत्रको विकासका लागि आफ्नो तर्फबाट सक्दो सहयोग गर्ने समेत उनले बताए ।

कार्यक्रममा ३ नम्बर प्रदेशका आन्तरिक मामिला तथा कानून मन्त्री शालिकराम जम्कट्टेल, आर्थिक मामिला तथा योजना मन्त्री कैलाश ढुंगेल, राष्ट्रियसभा सदस्य रामनारायण बिडारी, रामचन्द्र राई, प्रदेश प्रमुख प्रतिपक्ष दलका नेता इन्द्रबहादुर बानियाँ, प्रदेश सभा सदस्य कुमारी मोक्तान, संविधानसभा सदस्य अनन्त पौडेल, राष्ट्रिय सूचना आयोगका प्रमुख सूचना आयुक्त कृष्णहरि बास्कोटा, जिल्ला समन्वय समितिका संयोजक रघुनाथ खुलाल, नेपाल पत्रकार महासंघ महासचिव रमेश विष्ट, पत्रकार ऋषि धमलालगायतले मन्तव्य व्यक्त गरेका थिए ।

कार्यक्रम अनलाईनका प्रधान सम्पादक एवं अध्यक्ष गिरिजा अधिकारीको सभाध्यक्षतामा भएको थियो ।