हेटौडामा विपद व्यवस्थापन तथा अनुकुलन गोष्ठी

८ चैत, हेटौँडा । सामुदायिक वन उपभोक्ता महासंघ, मकवानपुरको आयोजना र सामुदायिक विकास केन्द्र, नेपाल (सिसिडिएन)को सहयोगमा शुक्रवार हेटौडामा एक दिने विपद व्यवस्थापन तथा जलवायु परिवर्तन अनुकुलन मुलप्रवाहीकरण गोष्ठीको आयोजना गरिएको छ ।
जिल्ला समन्वय समिति मकवानपुरकी उपप्रमुख भगवती पुडासैनीको प्रमुख आतिथ्यता एवम सामुदायिक वन उपभोक्ता महासंघ, जिल्ला महासंघ मकवानपुरका अध्यक्ष साधुराम चौलागाईको अध्यक्षतामा गोष्ठी भएको हो । गोष्ठीमा उपभोक्ता समूहको अवधारणा, जलवायु परिवर्तन अनुकुलनका क्रियाकलाप, विपद जोखिम न्यूनीकरण, अवधारणा, औचित्य, नीति नियम, सामुदायिक वनको वार्षिक योजना, अनुकुलनका वर्तमान अवस्थाको विश्लेषण, भावी योजना लगायतका विषयहरुमा समूहगत छलफल गरिएको थियो । 
कृष्ण ओझा र हेमन्त जोशीले सहजीकरण गरेको गोष्ठीमा डिभिजन वन कार्यालय मकवानपुरका सहायक वन अधिकृत अच्युतप्रसाद लामिछाने, सामुदायिक वन उपभोक्ता महासंघ प्रदेश नं. ३ का सदस्य रामहरी चौलागाई, सामुदायिक वन उपभोक्ता महासंघ, स्थानीय महासंघ, हेटौडाका अध्यक्ष शम्भुप्रसाद न्यौपाने, सामुदायिक विकास केन्द्र,नेपालका नवराज थापा लगायतकाले मन्तव्य व्यक्त गरेका थिए । 
कार्यक्रममा विभिन्न सामुदायिक वनका पदाधिकारी, कर्मचारी र सञ्चारकर्मीहरुको सहभागिता रहेको थियो ।