सन्ध्यामा सञ्जेलको क्षितिज यात्रामाथि विमर्श

९ चैत, हेटौँडा । साहित्य सङ्गम मकवानपुरको साहित्य सन्ध्यामा क्षितिज यात्रा माथि विमर्श गरिएको छ । सङ्गमको २८२ औं साहित्य सन्ध्याको अवसरमा मुक्तककार विश्वनाथ सञ्जेलको मुक्तकसङ्ग्रह क्षितिज यात्रा माथि विमर्श गरिएको हो ।
गतमहिना प्रकाशित सञ्जेलको कृति क्षितिज यात्रामाथि साहित्यकारहरुले समिक्षासहित विमर्श गरेका हुन् । कार्यक्रममा क्षितिज यात्रा माथि साहित्यकार रमेशमोहन अधिकारी, देवराज तिवारी, दीपक गौतम र सुवास खनालले समिक्षा गरेका थिए । उनिहरुले सङ्ग्रहमा समावेश मुक्तक प्रगतीवादी धारका रहेको बताए । मुक्तकहरुले देश र समाजका घटनालाई उतार्दै खबरदारी समेत गरेको उल्लेख गरे ।  सञ्जेलको क्षितिज यात्रा दोस्रो कृति हो । यस अघि २०६८ मा उनले गजलसङ्ग्रह पलपलको मूल्य प्रकाशन गरिसकेका छन् ।
झरना साहित्यिक परिवारले प्रकाशन गरेको क्षितिज यात्रामा १ सय ८ वटा मुक्तक समावेश गरिएको छ । सञ्जेल झरनाका उपाध्यक्ष, संगमका सदस्य हुन् । कविता, गजल, मुक्तक, समिक्षा तथा समालोचनामा कलम चलाउने सञजेल शिक्षाशास्त्र सङ्कायमा स्नातकोत्तर हुन् । साहित्य सङ्गमकी उपाध्यक्ष अनिता न्यौपानेको अध्यक्षतामा भएको कार्यक्रमको प्रमुख अतिथि साहित्यकार लेखक आन्नदराम पौडल रहेका थिए । कार्यक्रममा विशिष्ट अतिथि साहित्यकार निर्मोही व्यास रहेका थिए । कार्यक्रममा साहित्यकार तुल्सी थापा, आरसी रिजाल लगायतले मन्तव्य व्यक्त गरेका थिए । कार्यक्रममा साहित्यकारले रचना वाचन गरेका थिए  ।