पुलिसले फ्रेण्डस क्लबलाई ३ गोलले पाखा लगायो

 ११ चैत, हेटौंडा । हेटोँडामा जारी दोस्रो भूगर्भ सिमेन्ट सहिद स्मृति राष्ट्रिय फुटबल प्रतियोगिताको सोमबार भएको खेलमा फ्रेण्डस क्लब काठमाडौं र पुलिस क्लब बिचको खेलमा लाई फ्रेण्डस क्लबलाई ३–० गोलअन्तरले पाखा लगाउदै नेपाल पुलिस क्लब सेमिफाइनलमा प्रवेश गरेको छ । हेटौंडा–१० स्थित वनविज्ञान खेल मैदानमा जारी प्रतियोगितामा फ्रेण्डस क्लब काठमाडौंलाई ३–० गोलअन्तरले पराजित गर्दै पुलिसले अन्तिम चारमा स्थान सुरक्षित गरेको हो । 
पुलिसको जीतका लागि जर्सी नम्बर १०का भरत शाहले ह्याट्रिक गरे । उनले खेलको १२ औं मिनेटमा गोल गर्दै पुलिसलाई अग्रता दिलाएका थिए । खेलको ४२ औं मिनेटमा दोस्रो गोल गरेका भरतले त्यसको १ मिनेट नबित्दै ४३ औं मिनेटमा ह्याट्रिक पूरा गरे । खेलको म्यान अफ दी म्याच पुलिसका ह्याट्रिक  गर्ने खेलाडी भरत घोषित भए । उनले नगद दशहजार रुपियाँ प्राप्त गरेका थिए । उनी प्रतियोगिता सर्वाधीक गोलकर्ता समेत भएका छन् ।
 पहिलो हाफ्मा पुलिसले फ्रेण्डसमाथि पूर्ण दबाब बनाएपनि दोस्रो हाफ्मा भने सकेन । दोस्रो हाफमा फ्रेण्डसले सुधारको खेल प्रस्तुत गरेको थियो । फ्रेण्डसका लागि विदेशी खेलाडी फोफना र स्यान्कोले दोस्रो हाफ्मा राम्रो मौका पाएपनि गोल गर्न सकेनन् । अब फाइनल प्रवेशका लागि पुलिसले घरेलु टोलि मकवानपुर–११ सँग प्रतिस्पर्धा गर्नेछ ।
यसैक्रममा मंगलबारको खेल थ्रीस्टार क्लब र सरस्वती क्लबबीच हुनेछ । मकवानपुर जिल्ला फुटबल संघको आयोजनामा जारी प्रतियोगिताको विजेताले नगद आठलाख रुपियाँ र उपविजेताले नगद चारलाख रुपियाँ प्राप्त गर्नेछन् । त्यसैगरी सर्वोत्कृष्ट खेलाडीलाई नगर ७५ हजार र उत्कृष्ट खेलाडी तथा प्रशिक्षकलाई जनही २०/२० हजार प्रदान गरिनेछ । प्रतियोगितामा १० टिमको सहभागिता रहेको छ  ।