सरस्वतीलाई हराउँदै थ्रीस्टार सेमिफाइनलमा प्रवेश

१२ चैत, हेटौँडा । हेटोँडामा जारी दोस्रो भूगर्भ सिमेन्ट सहिद स्मृति राष्ट्रिय फुटबल प्रतियोगिताको मंगलबार भएको  सरस्वती युवा क्लब र थ्रीस्टार क्लब बिचको खेलमा सरस्वती युवा क्लबलाई २–० गोल अन्तरले पाखा लगाउदै थ्रीस्टार क्लब सेमिफाइनलमा प्रवेश गरेको छ । 
हेटौंडा–१० स्थित वनविज्ञान खेल मैदानमा जारी प्रतियोगितामा सरस्वती युवा क्लबलाई २–० गोलअन्तरले पराजित गर्दै थ्रीस्टारले अन्तिम चारमा स्थान सुरक्षित गरेको हो ।
थ्रीस्टारलाई जिताउन खेलको २४ औं मिनेटमा विदेशी खेलाडी मान्साको गोलको थ्रीस्टारले खाता खोलेको थियो । त्यसैगरी थ्रीस्टारका डिफेन्डर पिटरले खेलको ६० औं मिनेटमा गोल गर्दै थ्रीस्टारले २ का विरुद्ध सुन्य गोल अन्तरले जीत सुनिश्चित गरेको हो । 
उत्कृष्ट गोल गरेसंगै थ्रीस्टारका पिटर खेलको म्यान अफ दी म्याच समेत घोषित भए । उनले नगद दशहजार रुपियाँ समेत हात पारे । थ्रीस्टारले जीतसँगै सेमिफाइनलमा क्यामरुनी क्लब दाफिन्ससँग भेट पक्का गरेको छ भने भोलि बुधबार पहिलो सेमिफाइनल खेल आयोजक मकवानपुर ११ र नेपाल पुलिस क्लबबीच हुने आयोजकले जनाएको छ । 
मकवानपुर जिल्ला फुटबल संघको आयोजनामा जारी प्रतियोगिताको विजेताले नगद आठलाख रुपियाँ र उपविजेताले नगद चारलाख रुपियाँ प्राप्त गर्नेछन् । त्यसैगरी सर्वोत्कृष्ट खेलाडीलाई नगर ७५ हजार र उत्कृष्ट खेलाडी तथा प्रशिक्षकलाई जनही २०र २० हजार प्रदान गरिनेछ । प्रतियोगितामा १० टिमको सहभागिता रहेको छ  ।