जनप्रतिनिधि र वन कर्मचारीबीच हेटौडामा संयुक्त बैठक

१३ चैत, हेटौँडा । स्थानीय जनप्रतिनिधि र वनका कर्मचारी विच कसरी समन्वय गरि काम गर्न सकिन्छ भन्ने विषयमा आज हेटौडाको पिप्लेपोखरा सामुदायिक वन उपभोक्ता समूहको सभाहलमा स्थानीय तहसँग समन्वय बैठक भएको छ ।
जनप्रतिनिधि र कर्मचारी विच काम गर्ने क्रममा असमझदारी बढेको जनगुनासो आईरहेको सन्दर्भमा यो बैठकले समझदारी कायम गर्ने अपेक्षा गरिएको छ । बैठकमा विभिन्न विषयहरुमा सौहाद्रपूर्ण वातावरणमा छलफल भएको थियो । बैठकमा कर्राखोला सरसफाई,भौतिक संरचना निर्माण,वन र वन्यजन्तु अपराध नियन्त्रण,वनक्षेत्रको जग्गा अन्य उपभोग,ढुङगा,गिटी,बालुवाको समस्याको समाधान लगायतका विषयहरुमा छलफल गरिएको थियो । बैठकले भविष्यमा वन कार्यालय र जनप्रतिनिधिहरुले मिलेर काम गर्ने सहमती समेत भएको बैठकमा सहभागी सव डिभिजन वन कार्यालयका फरेष्टर यदुकुमार घिमिरेले बताए ।
सव–डिभिजन वन कार्यालय,हेटौडाकी सहायक वन अधिकृत गायत्री शर्माको अध्यक्षतामा भएको बैठकमा हेटौडा–४ का वडा अध्यक्ष नविन सिग्देल, ६ का वडा अध्यक्ष अर्जुनप्रसाद चौलागाई, १५ का वडा अध्यक्ष महारत्न लामा, विभिन्न वडाका वडा सदस्यहरु, डिभिजन वन कार्यालय,मकवानपुरका सहायक वन अधिकृत अच्युत प्रसाद लामिछाने, सवडिभिजन वन कार्यालय हेटौडाका रेन्जर रविन देवकोटा, पिप्लेपोखरा सामुदायिक वनका अध्यक्ष रामहरी चौलागाई लगायतको सहभागिता रहेको थियो ।