सालक संरक्षण तथा वन डढेलो नियन्त्रणसम्बन्धी अन्तरक्रिया

१४ चैत, हेटौँडा । हेटौँडा–६ चुच्चेखोलामा रहेको चुच्चेखोला सामुदायिक वन समूहको आयोजनामा विहिबार सालक संरक्षण तथा वन डढेलो नियन्त्रणसम्बन्धी अन्तरक्रिया कार्यक्रम सम्पन्न भएको छ । डिभिजन वन कार्यालय मकवानपुरका निमित्त प्रमुख राधिका शर्माको प्रमुख आतिथ्यता एवं वन समूहका अध्यक्ष अर्जुनप्रसाद दाहालको सभाध्यक्षतामा अन्तरक्रिया कार्यक्रम भएको हो । 
कार्यक्रममा हेटौँडा वडा नम्बर ६ का वडा अध्यक्ष अर्जुनप्रसाद चौलागाई, मकवानपुरवढी वडा नम्बर १ का वडा अध्यक्ष आइतसिं लो, २ का वडा अध्यक्ष बखानसिंह पाख्रिन, ३ का वडा अध्यक्ष भागवत घिमिरे, वडा सदस्यहरु, विभिन्न सामुदायिक वनका पदाधिकारी, सुरक्षा निकायका पदाधिकारी लगायतले सालक संरक्षण र वन डढेलो नियन्त्रणमा सामुदायिक प्रयासमा जोड दिएका छन् । उनीहरुले आफ्नो समुदायमा सचेतना अभिबृद्धिका साथै आफ्नो क्षेत्रमा रहेका स्थानीय तह, सरकारी निकाय, वन समूह, संघसंस्थासंगको समन्वयमा जोड दिएका थिए । कार्यक्रममा वन डढेलो नियन्त्रणका लागि रणनीतिक योजना तयारी गरेर लाग्न नदिनेतर्फ प्रयास गर्नुपर्ने धारणा राखेका थिए ।
कार्यक्रममा जेडएसएल अमलेखगञ्ज शाखा प्रमुख प्रचण्डमान महर्जन, मिथिला वाईल्ड लाईफ ट्रष्टका अध्यक्ष देवनारायण मण्डल, हेटौँडा वडा नम्बर ६, ७, १६, १७, १८ का वन समूहका अध्यक्ष एवं प्रतिनिधि, जनप्रतिनिधि, इलाका प्रहरी कार्यालय गढी, चौघडा प्रहरी चौकीका प्रतिनिधि लगायतको सहभागिता रहेको चुच्चेखोला सामुदायिक वन समूहका कार्यालय सचिव केदारप्रसाद गौतमले बताए ।