बाराको जितपुरमा परीक्षार्थी र प्रहरीबीच झडप

१६ चैत, बारा । माध्यमिक शिक्षा परीक्षा (एसईई) रद्द गरिएको विरोधमा प्रदर्शनमा उत्रेका परीक्षार्थी र प्रहरीबीच शनिबार झडप भएको छ । वीरगन्ज–पथलैया सडक खण्डको जितपुर बजारमा परीक्षार्थीले गरेको राजमार्ग अवरुद्धलाई खुलाउन खोज्ने क्रममा सडकको भीडलाई तितरबितर  पार्दा परीक्षार्थीहरुले ढंगामुढा गर्न थालेपछि झडप भएको हो । झडपले स्थिती तनावपूर्ण भएपछि नियन्त्रणको लागि प्रहरीले दर्जन सेल अश्रु ग्यास र हवाइ फायर गरेको छ । 
झडपको क्रममा सशस्त्र र नेपाल प्रहरीका केही महिला प्रहरी जवान घाइते भएका छन्। घाइतेको सिमराको स्थानीय अस्पतालमा उपचार भइरहेको छ। नेपाल प्रहरीकी जवान निरु श्रेष्ठको टाउकोमा गम्भीर चोट छ। झडपको क्रममा परीक्षार्थीले सशस्त्र प्रहरीको ना१झ ७१२ नम्बरको जीपमा आगजनी गरेको छ। जीपको पछाडिको भाग जलेको छ। जितपुर बजार र पथलैया–वीरगन्ज राजमार्ग खण्डको आवागमन बिहानैदेखि ठप्प पारेका थिए ।
प्रहरीको कुटाइले केही विद्यार्थीसमेत घाइते भएपछि जितपुरको अवस्था अहिले पनि तनावपूर्ण छ। आक्रोशित परीक्षार्थीहरुले बजारको सीसी क्यामरा फुटाएका छन्। बजारको प्रतीक्षालय र वीरगन्जबाट थप मद्दतमा पुगेका सुरक्षाकर्मीको अन्य गाडीसहित केही भाडाका गाडीमा तोडफोड गरेका छन्।
उता कलैयामासमेत विहान प्रदर्शन गरिएको छ। विरोध जुलुसमा घुसपैठ भएको सुरक्षा अधिकारीहरुले दाबी गरेका छन्। जितपुरबाट झडपको क्रममा पाँच जनालाई नियन्त्रणमा लिइएको जिल्ला सुरक्षा समितिका प्रमुखसमेत रहेका प्रमुख जिल्ला अधिकारी राजेश पौडेलले बताए । 
साभार : कान्तिपुर