कांग्रेस जिल्ला सभापतिको भेला ‘बेमौसमको बाजा’ : बानियाँ

२० चैत, हेटौँडा । नेपाली कांग्रेसको एक समूहले काठमाण्डौंमा बुधबारदेखि जिल्ला सभापतिहरुको भेला गरेकोमा नेपाली कांग्रेस मकवानपुरका सभापति ईन्द्रबहादुर बानियाँले विरोध गरेका छन् ।

नेता बानियाँले बुधबार हेटौँडामा पत्रकार सम्मेलनको आयोजना गरी अहिलेको भेला ‘बेमौसमको बाजा’ भएको समेत बताए । बारा र पर्सामा विपदमा परिरहेकाहरुलाई के गर्न सकिन्छ भनेर सोच्नुपर्ने बेलामा देशभरका सभापतिहरुलाई दुःख दिने काम गलत भएको उनको भनाई छ । उनले जिल्ला सभापतिहरुको एकतालाई विथोल्ने र गुटको राजनीतिलाई प्रश्रय दिने काम नलाग्न शिर्ष नेतृत्वलाई आग्रह गरे ।

उनले पार्टीका शिर्ष नेतृत्वलाई मर्यादित ढंगबाट आफ्नो असहमति केन्द्रीय कार्यसमितिमा राख्न र आगामी महाधिवेशनबाट आफ्ना मतलाई स्थापित गर्न सुझाव दिए । पार्टीको निर्णय अनुसार जिल्ला सभापतिहरुको हेटौँडामा भएको जिल्ला सभापतिहरुको भेलाले विधानबारे आफ्नो धारणा दिईसकेको उनको भनाई छ । जिल्ला सभापतिहरुको साझा राय विपरित नयाँ बिधान आउनु दुर्भाग्य भन्दै उनले यसबारे विधान विपरितका गतिविधि गर्नु पनि गैरजिम्मेवार गतिविधि हुने बताए । 

प्रजातन्त्रका लागि लडेको नेपाली कांग्रेस पद्धति अनसार अघि बढ्नुपर्ने बताउँदै उनले पार्टीका सबै नेता कार्यकर्ता पार्टी विधान अनुसार चल्नुपर्नेमा जोड दिए । उनले आफ्नो पक्षमा सभापतिहरुलाई उभ्याएर शक्ति प्रर्दशनमा लाग्ने कार्य नगर्न र त्यस्ता कार्यमा नलाग्न पनि सबैलाई आग्रह गरे ।