संशोधनको माग गर्दै कानून मन्त्री जम्कट्टेलाई ज्ञापनपत्र

२४ चैत, हेटौँडा । ३ नम्बर प्रदेश सभामा प्रस्तुत भएको सूचनाको हक सम्बन्धी विधेयकले सूचनाको हक सम्बन्धी अधिकारलाई कमजोर बनाउने भन्दै संशोधनका लागि ज्ञापनपत्र बुझाईएको छ । सूचनाको हक सम्बन्धी नागरिक अभियान मकवानपुरले संशोधनको माग गर्दै प्रदेशका आन्तरिक मामिला तथा कानूनमन्त्री शालिकराम जम्कट्टेललाई ज्ञापनपत्र बुझाएको हो । 
अभियानका अध्यक्ष एवं नेपाल पत्रकार महासंघ मकवानपरका उपाध्यक्ष कुमार अधिकारीले बुझाएको ज्ञापनपत्रमा विधेयकको प्रावधान अनुसार प्रदेश पुनरावेदन समिति मन्त्रालयको इकाईको रुपमा रहने भएकाले यसलाई स्वायत्त समिति बनाउनुपर्ने माग गरिएको छ । यसैगरी, पुनरावेदन समितिको सट्टा प्रदेश सूचना अयोग बनाईनुपर्ने, समितिका अध्यक्ष र पदाधिकारी चयन गर्ने समिति सभामुखको संयोजकत्वमा बनाईनुपर्ने, सूचना नदिने अधिकारीलाई कारवाहीको दायरामा ल्याईनुपर्ने लगायतका माग गरिएको छ । कार्यक्रममा पत्रकार महासंघका सचिव गणेशदर्पण अधिकारी, सहसचिव धर्मेन्द्र दाहाल, पत्रकार गिरिजा अधिकारी, रुपेश दुलाल लगायतका सहभागिता रहेको थियो । 
मन्त्री जम्मकट्टेलले विधेयकमाथि उठेका विषयहरु सराकात्मक रहेको भन्दै आफुहरुले आवश्यकता अनुसार संशोधनका लागि काम गर्ने बताए । उनले प्रदेशसभादेखि सरोकारवालाहरुसम्मको सुझाव र विषयगत समितिमा भएको छलफलबाट प्रदेश सूचनाको हक सम्बन्धी विधेयक अधिकार स्थापित गर्ने ढंगको बन्ने विश्वास समेत व्यक्त गरे ।
प्रदेशसभामा प्रस्तुत विधयेकमाथि सांसदहरुले पनि संशोधन परेको प्रदेशसभा सचिवालयले जनाएको छ ।