ऐन संशोधनका लागि सभामुख र समिति सभापतिलाई ज्ञापनपत्र

२५ चैत, हेटौँडा । ३ नम्बर प्रदेश सभामा प्रस्तुत भएको सूचनाको हक सम्बन्धी विधेयकले सूचनाको हक सम्बन्धी अधिकारलाई कमजोर बनाउने भन्दै संशोधनका लागि सभामुख र समिति सभापतिलाई ज्ञापनपत्र बुझाईएको छ । सूचनाको हक सम्बन्धी नागरिक अभियान मकवानपुरले संशोधनको माग गर्दै प्रदेशका सभामुख सानुकुमार श्रेष्ठ र प्रदेश मामिला समितिका सभापति माधवप्रसाद पौडेललाई ज्ञापनपत्र बुझाएको हो । 
अभियानका अध्यक्ष एवं नेपाल पत्रकार महासंघ मकवानपरका उपाध्यक्ष कुमार अधिकारी नेतृत्वको टोलीले श्रेष्ठ र पौडेललाई सभामुखको कार्यकक्षमा ज्ञापनपत्र बुझाएको छ । ज्ञापनपत्रमा विधेयकको प्रावधान अनुसार प्रदेश पुनरावेदन समिति मन्त्रालयको इकाईको रुपमा रहने भएकाले यसलाई स्वायत्त समिति बनाउनुपर्ने माग गरिएको छ । 
यसैगरी, पुनरावेदन समितिको सट्टा प्रदेश सूचना अयोग बनाईनुपर्ने, समितिका अध्यक्ष र पदाधिकारी चयन गर्ने समिति सभामुखको संयोजकत्वमा बनाईनुपर्ने, सूचना नदिने अधिकारीलाई कारवाहीको दायरामा ल्याईनुपर्ने लगायतका माग गरिएको छ । कार्यक्रममा गिरिजा अधिकारीले ऐनका प्रावधान र त्यसले पार्ने दिर्घकालिन असरबारे दुबै जनालाई अवगत गराएका थिए । 
ज्ञापनपत्र बुझ्दै सभामुख श्रेष्ठले अभियानले उठाएका विषयबस्तुहरु प्रदेशभा सो विधेयकमाथिको सैद्धान्तिक छलफलका क्रममा सांसदहरुले उठाएकाले यसलाई विषयगत समितिले ध्यान दिने विश्वास व्यक्त गरे । प्रदेश मामिला समितिका सभापति पौडेलले विधेयकलाई दिर्घकालसम्म संशोधन गर्नुपर्ने ढंगले तयार गर्नका लागि सरोकारवाला पक्षसंग छलफल गरेर मात्रै समितिको बैठक बस्ने बताउँदै अभियानको ज्ञापनपत्रले यसका लागि थप सहयोग गरेको बताए । कार्यक्रममा नेपाल पत्रकार महासंघका कार्यसमिति सदस्यहरु र संचारकर्मीहरुको सहभागिता रहेको थियो ।