सांसदहरुले सोधे : प्रदेशको स्थायी राजधानी कहिले ?

२६ चैत, हेटौँडा । ३ नम्बर प्रदेशका प्रदेशसभा सदस्यहरुले प्रदेशको स्थायी राजधानीको टुंगो कहिले लाग्ने भनेर प्रश्न गरेका छन् ।
मंगलबार प्रदेशसभाको विशेष समयमा बोल्दै उनीहरुले राजधानको टुंगो लगाउन आलटाल नगर्न समेत सचेत गराएका छन् । प्रमुख प्रतिपक्ष दल नेपाली कांग्रेसकी प्रमुख सचेतक राधा घलले राजधानी बारेको अन्यौलताले जनताले प्रदेश सरकारलाई गिज्याईरहेको बताईन् । उनले दुईतिहाई नेतृत्वको सरकारलाई राजधानी तोक्न के कुराले छेक्यो भनेर प्रश्न गरिन् । लामो समयको अन्यौलतापछि प्रदेश सदस्यको दवावबीच राजधानीको विषयले प्रवेश पाएको भन्दै उनले फेरि किन ढिलाई भएको भन्नेबारेमा आफुहरु अन्यौलमा रहेको बताईन् । उनले ९ दिनमा नौलो, २० दिनमा विर्सियो भन्ने नेपाली उखान चरितार्थ नगर्न समेत सचेत गराएकी छिन् । उनले राजधानीको विषय अघि बढ्ने हो भने प्रतिपक्ष फरक ढंगले प्रस्तुत हुनुपर्ने चेतावनी दिईन् । 
त्यसैगरी, सत्तापक्षीय प्रदेशसभा सदस्य रत्नप्रसाद ढकालले प्रदेशसभाको अधिकार प्रयोग गर्दै राजधानी तोक्नुपर्नेमा जोड दिए । अर्का प्रदेशसभा सदस्य ओमबहादुर ग्लानले प्रदेशको राजधानीसंग नामाकरण समेत टुंगो लगाउनुपर्नेमा जोड दिंदै नाम भने नेवा–ताम्सालिङ हुनुपने बताए । त्यस्तै, प्रदेशसभा सदस्य हिरानाथ खतिवडाले पनि राजधानी र नाम टुंगो लगाउन ढिलाई गर्न नहुने बताए । 
प्रदेशसभाको चैत १७ गतेको बैठकमा सभामुख सानुकुमार श्रेष्ठले प्रदेश राजधानीको टुंगो लगाउन उद्देश्यले कार्यविधि तय गर्न समिति गठन गर्ने व्यहोरा सुनाएका थिए । तर त्यसपछि कुनै पनि काम अघि नबढेको भन्दै प्रमुख प्रतिपक्ष दल नेपाली कांग्रेस र सत्तापक्षीय प्रदेशसभा सदस्य समेत रुष्ट छन् । सत्तापक्ष र प्रतिपक्षसंग समन्वय गरी समिति गठन गर्ने रणनीतिमा रहेका श्रेष्ठले सत्तापक्षबाट ‘ग्रिन सिग्नल’ नआउँदा प्रक्रिया अघि बढाएका छैनन् ।