१९ वर्ष मुनिको विश्वकप क्रिकेट छनोट खेलमा नेपालको तेश्रो जित 

३ वैशाख, हेटौँडा । १९ वर्ष मुनिको विश्वकप क्रिकेटअन्तर्गत एसियाली छनोट प्रतियोगितामा नेपालले तेश्रो जित निकालेको छ । मंगलबार भएको आफनो चौथो खेलमा नेपालले ओमनलाई १५० रनले पराजित गरेको हो ।
नेपालले दिएको २३० रनको लक्ष्य पछ्याएको ओमन ४५ औं ओभरको पहिलो बलमा ७९ रन बनाउँदै ‘अल आउट’ भएपछि १५० रनको पराजय व्यहोर्न बाध्य भयो ।
मलेसियाको सेलाङ्गोर टर्फ क्लबमा ओमनले टस जितेर फिल्डिङ रोजेपछि ब्याटिङमा उत्रिएको नेपालले ४३ ओभर दुई बलमा सबै विकेट गुमाउँदै २२९ रन बनाएको थियो ।
नेपालका लागि रोहित पौडेलले सर्वाधिक ७५ रन बनाए भने प्रतीष जिसीले ४१, भीम सार्कीले ३९, अभिषेक बस्नेतले १५, रित गौतमले १० रन बनाए ।
जवाफी ब्याटिङमा उत्रिएको ओमनका लागि अमनप्रित सिराह र जील टन्नाले १३–१३ रन बनाए । अन्य ब्याट्सम्यानले दोहोरो अंकमा रन बनाउन सकेनन् ।
नेपालका लागि पवन शराफले कसिलो बलिङ गर्दै १० ओभरमा २४ रन दिएर तीन विकेट लिए । १० ओभर नै बलिङ गरेका कुशल मल्लले १२ रन दिएर एक विकेट लिए । प्रतीष जिसी र सूर्य तामाङले दुई–दुई विकेट लिए ।
जारी प्रतियोगितामा नेपालको यो चौथो खेल हो । तीन खेलमा जित र एक हार व्यहोरेको नेपालले विश्वकपका लागि छनौट हुने सम्भावना जीवित राखेको छ । तर त्यसका लागि नेपालले आफ्नो बाँकी खेल जित्नुपर्नेछ भने युएईले कम्तिमा एक खेल हार्नुपर्नेछ ।

फोटोः गुगल