प्रमुख निर्वाचन आयुक्तमा थपलिया सर्वसम्मत 

४ वैशाख, हेटौँडा । प्रमुख निर्वाचन आयुक्तमा दिनेशकुमार थपलियालाई संसदीय सुनुवाई समितिले अनुमोदन गरेको छ । बुधबार बसेको समितिको बैठकले संवैधानिक परिषदद्वारा प्रमुख निर्वाचन आयुक्तमा सिफारिस थपलियाको नाम सर्वसम्मतिले अनुमोदन गरेको हो । 
उजुरीसहित व्यापक छलफल गरी समितिका सबै सदस्यहरुको सहमतिमा प्रमुख निर्वाचन आयुक्तमा थपलियाको नाम अनुमोदन गरिएको समितिका सभापति लक्ष्मणलाल कर्णले जानकारी दिए । समितिको बुधबार बिहान बसेको बैठकमा थपलियाविरुद्ध उजुरी दिने उजुरीकर्ताहरुसँग छलफल गरिएको थियो ।
त्यसपछि दुई बजे प्रस्तावित प्रमुख निर्वाचन आयुक्त थपलियाको सुनुवाई गरिएको थियो । सुनुवाईको क्रममा थपलियाले अघि सार्नु भएको निर्वाचनसम्बन्धि योजनामा चित्त बुझेपछि समितिले उनको नाम प्रमुख निर्वाचन आयुक्तमा अनुमोदन गरेको हो ।
बैठकले राष्ट्रिय समावेशी आयोगकी सदस्यमा प्रस्तावित विष्णुमाया ओझाको नाम पनि अनुमोदन गरेको छ । 
समितिले सबै संवैधानिक निकायको नियुक्ती प्रक्रिया संवैधानिक व्यवस्था अनुसार नै अघि बढाउन पनि संवैधानिक परिषदको ध्यानाकर्षण पनि गराएको छ । रिक्त हुनु एक महिना अघि नै संवैधानिक निकायमा पदाधिकारी नियुक्त गर्ने संवैधानिक व्यवस्थाको पालना गर्न संवैधानिक परिषदको ध्यानाकर्षण गराउने निर्णय गरेको पनि समितिका सभापति लक्ष्मणलाल कर्णले बताए । 
यसैगरी समितिले संवैधानिक निकायको पदाधिकारी नियुक्ती गर्दा उपयुक्त व्यक्तिको छनौट गर्ने लगायतका विषयमा प्रधानमन्त्री एवम् संवैधानिक परिषदका अध्यक्ष केपी शर्मा ओलीसँग छलफल गर्ने निर्णय पनि गरेको छ । 
प्रधानमन्त्रीसँगको छलफलपछि समितिको आफ्नो काममा पनि अझ परिपक्वता आउने समितिका सभापति कर्णले विश्वास पनि व्यक्त गरे ।
संसदीय सुनुवाई समितिले अनुमोदन गरेका थपलियालाई राष्ट्रपति विद्या भण्डारीले प्रमुख निर्वाचन आयुक्तमा नियुक्त गर्ने संवैधानिक व्यवस्था छ ।