चिसापानीमा सप्ताह ज्ञान महायज्ञ लगाईने

१० मंसिर, हेटौँडा । हेटौंडा-१९ स्थित हटिया चिसापानीमा रहेको शक्तेश्वर मन्दिरको स्तरोन्नती गर्ने उद्वेश्यले यही मंसीर २० गतेदेखि २८ गतेसम्म चिसापानी स्थित शक्तेश्वर मन्दिर परिसरमा वृहत श्रीमदभागवत सप्ताह ज्ञान महायज्ञ संचालगन गरिने भएको छ ।
समितिले शुक्रवार हटियामा पत्रकार सम्मेलनको आयोजना गरी यस्तो जानकारी गराएको हो । सप्ताह ज्ञानमहायज्ञका संयोजक लोकनाथ चौलागाईले मन्दिरको स्तरोन्नती, मन्दिर क्षेत्रको तारवार, पुष्पबाटिका निर्माण, बेहुली कोठा, जन्ती बस्ने कोठाको निर्माण गर्ने उद्वेश्यले सप्ताह ज्ञान महायज्ञको आयोजना गर्न लागेको बताए । महायज्ञका आर्थिक व्यवस्थापन उपसमितिका संयोजक सुरेशकुमार धिमालले सप्ताह ज्ञान महायज्ञमा करीव ५० लाख आर्थिक संकलन हुने बताए ।
सप्ताह ज्ञान महायज्ञमा युवा पण्डित गणेश उपमन्यु ढकालले संगीतमय कथावाचन गर्ने आयोजकले जनाएको छ । सप्ताहलाई व्यवस्थित गर्न समाजसेवी लोकनाथ चौलागाईको संयोजकत्वमा २ सय ५१ सदस्यीय मुल आयोजक समिति गठन गरिएको छ । यसैगरी सप्ताह ज्ञान महायज्ञलाई व्यवस्थित गर्न विभिन्न उपसमितिहरु समेत गठन गरिएको छ । रामकृष्ण कोईरालाको संयोजकत्वमा प्रचारप्रसार, ठाकुरदत्त खतिवडाको संयोजकत्वमा खरीद,भीमप्रसाद ढकालको संयोजकत्वमा मञ्च तथा प्रसाद, शिवप्रसाद नेपालको संयोजकत्वमा शोभायात्रा तथा पूजा, ईश्वरीप्रसाद दंगालको संयोजकत्वमा आवास तथा भान्सा, गोविन्द दुलालको संयोजकत्वमा विधुत र पानी,राजकुमार बास्तोलाको संयोजकत्वमा यातायात, लक्ष्मण दुलालको संयोजकत्वमा स्वास्थ्य उपसमिति गठन गरिएको छ ।

रामकृष्ण तिवारीको संयोजकत्वमा भौतिक निर्माण, देवकुमार घिमिरेको संयोजकत्वमा स्यमसेवक, कुमार थापाको संयोजकत्वमा स्लो बाईक रेस, जयप्रकाश घिमिरेको संयोजकत्वमा रक्तदान कार्यक्रमको जिम्मेवारी दिईएको छ । मंसीर १७ गते स्लोबाईक रेस, १८ गते वृहत मोटरसाईकल यात्रा संचालन गरिने पत्रकार सम्मेलनमा जानकारी गराईएको थियो । २० गते समुदघाटन र २१ गतेदेखि  झाँकी सहित संगीतमय कथाप्रवचन गरिने आयोजक समितिले जनाएको छ ।