प्रदेशसभामा मूख्यमन्त्रीका स्वकीयको हिनामिनादेखि राजधानीसम्मको चर्चा

४ बैशाख, हेटौँडा । ३ नम्बर प्रदेशसभामा विहिबार मूख्यमन्त्री डोरमणी पौडेलका स्वकीय सचिवको हिनामिनादेखि राजधानीसम्मको विषयले चर्चा पाएको छ ।
प्रदेशसभाको शुन्य समयमा बोल्दै २९ सांसदहरुले आफ्नो क्षेत्रको समस्याका साथै समसायिक विषयमा आफ्नो धारणा राखेका थिए । शुन्य समयमा बोल्दै सांसद न्हुच्छेनारायण श्रेष्ठले ३ नम्बर प्रदेशका मूख्यमन्त्री डोरमणी पौडेलले भ्रष्टाचारप्रति शुन्य सहनशिलताको प्रतिवद्धता जनाउने गरेपनि उनकै स्वकीय सचिव अनुप पौडेल संलग्न गैरसरकारी संस्थाले अनियमितता गरेको समाचार बाहिर आएको बताएका थिए । चेपाङ बाहुल्य क्षेत्रमा विद्यालय बनाउने नाममा भएको अनियमिताको सत्यतथ्य बाहिर ल्याउन सार्वजनिक लेखा समितिका सभापति समेत रहेका श्रेष्ठले माग गरेका थिए । 
उनले अस्थायी राजधानीको मानसिकता सरकारमा पनि रहेको भन्दै विकासमा समेत यस्तै मानसिकताले काम गरेको बताए । उनले एकातर्फ विकास बजेट खर्च नहुने र अर्कोतर्फ विकासको आशामा जनता रहने अवस्थाको अन्त्यका लागि यथाशिघ्र बजेट कार्यान्वयनका लागि ठोस पहल गर्न सरकारको ध्यानाकर्षण गराएका थिए । 
प्रदेशसभा सदस्य लक्ष्मण लम्सालले स्थायी राजधानीको टुंगो छिटो लगाउनुपर्ने माग राखे । त्यस्तै विजया श्रेष्ठ केसीले प्रदेश सरकारले विभिन्न विषयमा पुस्तक प्रकाशन गरिरहेको भन्दै मितव्ययीताका लागि यसको सट्टा ई–लाईब्रेरीको व्यवस्था गर्नु जरुरी रहेको बताईन् । सांसद रमेश पौड्यालले ललिता निवासको जग्गा खरिद गर्नेलाई क्षतिपूर्ति दिनुपर्ने विषयलाई व्यंग्य गरेका थिए ।
प्रदेशसभा सदस्यहरु सुरेन्द्रराज गोसाई, रत्न ढकाल, प्रदिपकुमार कटुवाल केसी क्षेत्री लगायतले राजधानीबारे छिटै टुंगो लगाउनुपर्ने माग गरेका थिए । त्यस्तै, सांसद रजनी अमात्य जोन्छेले भक्तपुरमा खानेपानीको समस्या समाधान र बाहिरि चक्रपथको नक्सा सार्वजनिक गर्न सरकारको ध्यानाकर्षण गराएकी थिईन् । 
सांसद राधा घलले प्रदेशसभामा संघीय सरकारका गतिविधिबारे उठेका प्रश्नहरुको रेकर्ड संघीय सरकारलाई उपलव्ध हुने व्यवस्था मिलाउन र मन्त्रीहरुको जवाफ दिने शैली सुधार्नुपर्नेमा जोड दिएकी थिईन् । प्रदेशसभा सदस्यहरुले विकास बजेट अहिलेसम्म कार्यान्वयनमा नआएको भन्दै असारमा बजेट खर्च गर्ने प्रवृत्तिको अन्त्य हुनुपर्नेमा जोड दिएका थिए ।