नेपाली सेनाले जारी गर्यो सैनिक आचारसंहिता

६ बैशाख, काठमाडौं । नेपाली सेनाले सैनिक आचार संहिता जारी गरेको छ । प्रधान सेनापति पूर्णचन्द्र थापाले शुक्रबार एक कार्यक्रमकाबीच सैनिक आचारसंहिता–२०७६ जारी गरेका हुन् । 
नेपाली सेनामा कार्यरत कर्मचारीले सेवा रहँदा र सेवा निवृत भइसकेपछि के गर्ने के नगर्ने भन्नेबारे सो आचार संहिताले प्रष्ट पार्ने नेपाली सेनाले जनाएको छ । शुक्रबारदेखि आगामी बैशाख १३ गतेसम्म आचारसंहिता सप्ताह कार्यक्रम समेत गर्ने जनसम्पर्क निर्देशनालयले जनाएको छ । केही समयअघि मात्रै सेनाका एक पूर्व उच्च अधिकारीले बोलेको अभिव्यक्ति विवादास्पद भन्दै नेपाली सेनाले उनलाई सचेत समेत गराएको थियो । 
‘आचार संहिताको सप्ताह सैनिक सदाचारको उत्साह’ भन्ने मूल नारा दिइएको छ । नेपाली सेनाले आर्थिक अपारदर्शिता, ‘चेनअफ कमाण्ड’ उल्लङ्गन र अनुशासन विपरीत गतिविधिका सम्बन्धमा संगठनभित्र कठोर नीति अवलम्बन गर्ने भएको छ । ‘सैनिक सदाचारको उत्साह’ भन्ने नाराका साथ शुक्रबार शुरु भएको सैनिक आचारसंहिता सप्ताह शुभारम्भ गर्दै प्रधानसेनापति पूर्णचन्द्र थापाले आचारसंहिता हास्यव्यङयको पुलिन्दाजस्तो नभएकाले यसको पालना नगर्नेलाई कारवाही गरिने चेतावनी दिए । पूर्खाको बलिदानबाट गौरब गर्न लायक सङ्गठनका रुपमा नेपाली सेना उभिनुपर्ने भन्दै प्रधानसेनापति थापाले सेनाको छवि धुमिल्याउन अझै पनि केही शक्ति सत्रिय रहेको बताए । 
आर्थिक अनियमिताविरुद्ध सङ्गठनले लिएको शून्य सहनशीलताको नीति जङ्गी अड्डाबाटै शुरु गरिने बताउँदै उनले विगतमा भएका अपारदर्शी क्रियाकलापले सङ्गठनलाई पारदर्शी बनाउन कठिन भएकाले यस विषयमा सकल दर्जाले हेक्का राख्नु आवश्यक भएको उल्लेख गरे ।

साभार : कान्तिपुर