मकवानपुरसहित ३ नम्बर प्रदेशमा औलोका २६ रोगी

११ बैशाख, हेटौँडा । मकवानपुरसहित ३ नम्बर प्रदेशका १३ जिल्लामा औलोका २६ रोगी फेला परेको तथ्यांक सार्वजनिक गरिएको छ । 
विश्व औलो दिवसको स्वास्थ्य निर्देशनालय हेटौँडाले बुधबार गरेको अन्तरक्रिया कार्यक्रममा यस्तो तथ्यांक सार्वजनिक गरिएको हो । कार्यक्रममा निर्देशनालयका भेक्टर कन्ट्रोल अधिकृत चन्द्रेश्वर झाले आर्थिक बर्ष ०७४/०७५ मा सबैभन्दा बढि चितवनमा १४ र सबैभन्दा कम काठमाडौंमा एक जना रोगी फेला परेको जानकारी दिए । त्यसैगरी, सिन्धुलीमा ५, काभ्रे र मकवानपुरमा ३/३ जना औलोका रोगी फेला परेको जनाईएको छ । आव ०७४/०७५ मा १ हजार १ सय ८७ विरामी फेला परेकोमा सबैभन्दा कम १ नम्बर प्रदेशमा २४ र सबैभन्दा बढि सुदुरपश्चिम प्रदेशमा ५ सय ८६ रहेका छन् ।
नेपालमा औलो रोगको उच्च जोखिममा रहेको जनसंख्या २ लाख १७ हजार ७ सय ६ र मध्यम जोखिममा रहेको जनसंख्या ९ लाख २७ हजार ४ सय १४ रहेको छ ।
मकवानपुरमा २ विरामी फेला
चालु आर्थिक बर्ष ०७५/०७६ मा मकवानपुरमा २ जना औलो रोगी फेला परेका छन् । ति मध्ये दुबै पुरुष रहेको जनाईएको छ । त्यस्तै मकवानपुरमा, ०७४/०७५ मा ३ जना पुरुष, ०७३/०७४ मा २ पुरुष र ०७२/०७३ मा ९ महिला, २ पुरुष गरी ११ जना औलो रोगी फेला परेको शशीकान्त सिंहले जानकारी दिए । कार्यक्रममा निर्देशनालयका निमित्त प्रमुख धुलाराम अधिकारी, पत्रकार प्रताप विष्ट, स्वास्थ्यकर्मी भुपनारायण यादव लगायतले मन्तव्य व्यक्त गरेका थिए । विश्व औलो दिवसको अवसरमा विहिबार हेटौँडामा प्रभातफेरी हुने जनाईएको छ ।