तरुण दल मकवानपुरले बुझायो प्रजिअ मार्फत प्रम ओलिलाई  ध्यानाकर्षण पत्र

१५ बैशाख, हेटौँडा । नेपाल तरुण दल मकवानपुरले जनताको स्वतन्त्रपूर्वक बाँच्न पाउने संवैधानिक अधिकार खोस्दै जनता र राष्ट्रलाई नै घात हुने गरी वर्तमान सरकारले अघि बढेको भन्दै त्यसलाई सच्याउनु पर्ने भन्दै प्रधानमन्त्री केपी शर्मा ओलीलाई जिल्ला प्रशासन कार्यालय मकवानपुर मार्फत ध्यानाकर्षण पत्र बुझाएको छ ।  

तरुण दल मकवानपुरका अध्यक्ष ईश्वर पाठकको नेतृत्वमा जिल्ला प्रशासन कार्यालय पुगेको तरुणको टोलीले प्रमुख जिल्ला अधिकारीमार्फत प्रधानमन्त्रीलाई ध्यानाकर्षण पत्र बुझाएको हो ।

आइतबार देशभरका जिल्ला प्रशासन कार्यालय मार्फत प्रधानमन्त्री केपी शर्मा ओलीलाई तरुण दलले ६ बुँदे ध्यानाकर्षणपत्र बुझाउने कार्यक्रम रहेकोले मकवानपुरबाट पनि ध्यानाकर्षण पत्र बझाएको तरुण दल मकवानपुरका अध्यक्ष ईश्वर पाठकले बताए ।  
तरुणले बुझाएको ६ बुदे ध्यानाकर्षण पत्रमा खानेपानी मन्त्री बिना मगर गैरजिम्मेवार भ्रष्टाचारी चरित्रको रहेको ठहर गरेको छ । ज्ञापनपत्रको ४ नम्बर बुँदामा तरुण दलले काठमाडौंका जनताले दशकौदेखिको मेलम्चीको पानी खाने सपना वर्तमान सरकारकोे कारण अधुरो रहेको ठहर गरिएको छ ।  ठेकेदार कम्पनी पनि पलायन भएकोप्रति तरुणले खेद प्रकट गरेको छ । मेलम्ची आयोजना भ्रष्टाचाररहित ढंगले सम्पन्न गर्न ज्ञापनपत्रमा माग गरिएको छ ।निर्मला पन्तको बलात्कारपछि हत्या भएको १० महिना भइसक्दा पनि अपराधमा संलग्नलाई पक्राउ गरी कारबाही गर्न नसकिएको भन्दै ज्ञापनपत्रमा सरकारको आलोचना गरिएको छ । तीनै तहको सरकारको हरेक तह र तप्कामा भ्रष्टाचार बढ्दै गएकोमा पनि तरुणले चिन्ता व्यक्त गर्दै भ्रष्टाचारलाई शून्यमा झार्नुपर्ने माग गरिएको छ । वाइडबडी भ्रष्टाचार काण्डले नेपाल र नेपालीको शीर निहुरिएको भन्दै अरबौंको भ्रष्टाचारको तत्काल छानविन गरी भ्रष्टाचारीलाई कारबाहीको लागि पनि तरुणले ध्यानाकर्षण गराएको छ ।

एनसेलले बुझाउनुपर्ने ७० अर्बभन्दा बढी राजस्व वर्तमान सरकारले विभिन्न बहाना गर्दै असुल उपर नगरेको आरोप पनि तरुण दलले लगाएको छ । बालुवाटार जग्गा काण्डमा संलग्न नेकपाका महासचिव विष्णु पौडेललगायत व्यक्तिलाई हदैसम्मको कारबाही हुनुपर्नेमा पनि ज्ञापनपत्रमा जोड दिइएको छ ।