गिरफ्तार अघि ज्वालाले भने–‘विद्रोह गर्ने बाहेक विकल्प छैन’

१६ बैशाख, हेटौँडा । नेत्रविक्रम चन्द्र ‘विप्लव’ नेतृत्वको नेकपाका मकवानपुर सेक्रेटरी बीरबहादुर घलान ‘ज्वाला’ ले जनताले विद्रोह गर्ने बाहेक विकल्प नरहेको बताएका छन् । 
सोमबार जिल्ला अदालत परिसरमा संचारकर्मीहरुसंग प्रतिक्रिया दिंदै उनले वर्तमान सरकारले आफ्नो कमजोरी लुकाउन कुनै समूह वा संगठनलाई दोष देखाउने काम गरिरहेको बताए । देशमा बढिरहेको बलात्कार, भ्रष्टाचार जस्ता क्रियाकलाप नियन्त्रण गर्न नसकेको सरकारले आफ्नो कमजोरी लुकाउन अरुलाई आरोप लगाउने र जनताको आँखामा छारो हालिरहेको उनको भनाई छ । उनले भने–‘यस्तो अवस्थामा जनताले विद्रोह गर्नुको कुनै विकल्प छैन ।’ 
उनले नेकपाका कार्यकर्तामाथि भईरहेको गिरफ्तार जायज नभएको बताउँदै उनले यस्तो अवस्थामा जनता खुशी नरहेको बताए । उनले नेकपाका कार्यकर्तालाई विना कारण फसाउने र यातना दिने काम भईरहेको बताए । पञ्चायती र शाही शासन कालमा पनि जनताको आवाज बन्द गर्ने काम हुने गरेको बताउँदै उनले अहिले लोकतान्त्रिक प्रक्रियामा पनि उस्तै व्यवहार भईरहेको गुनासो गरे । उनले वर्तमान सरकारले वार्तामा बोलाउने र ढोकामा बन्दुक राखेर आउलास् भन्ने दोहोरो चरित्र देखाएको बताए । 
नेकपालाई आपराधिक गतिविधि गर्ने जसरी व्याख्या गरिएको प्रति आपत्ति जनाउँदै उनले आफु अन्य कुनै पार्टीमा प्रवेश गर्ने भन्दा पनि आफ्नै ढंगले नेपालीलाई सुशी र देशलाई समृद्ध बनाउने अभियानमा लागि रहने बताए ।
सोमबार धरौटीमा रिहा भएका ज्वाला पुनः अदालत परिसरबाटै पक्राउ परेका छन् । उनलाई जिल्ला प्रहरी कार्यालय मकवानपुरमा राखिएको छ ।