प्रतिवद्धता अनुसार काम गरेर देखाउनुसः देउवा 

१६ वैशाख, हेटौँडा । प्रमुख प्रतिपक्षी दल नेपाली कांग्रेसका नेता शेर बहादुर देउवाले कुहिरोमा हराएको कागको नियतीबाट बाहिर निस्केर सही मार्गमा अघि बढ्न सरकारलाई सुझाव दिएका छन् ।
सोमबार संघीय संसदको बजेट अधिवेशनको पहिलो बैठकमा शुभकामना मन्तव्य राख्दै देउवाले संविधानको मार्गदर्शन र आफुले गरेको प्रतिवद्धता अनुसार काम गरेर देखाउन सुझाव दिए ।
विकास निर्माण भन्दा पनि शक्ति केन्द्रीकृत गर्ने गलत अभ्यासमा प्रधानमन्त्री लागेको आरोप देउवाको आरोप छ । उनले संविधान विपरित संबैधानिक अंगका अधिकार केन्द्रीकृत गर्ने प्रधानमन्त्रीको प्रयास सरकारकै लागि पनि प्रत्युत्पादक हुने चेतावनी दिए ।
उनले संबैधानिक मुल्य मान्यता विपरित सबै अधिकार आफुमा केन्द्रीत गरेर मुलुकको विकास गर्न सक्छु भन्ने भ्रमबाट मुक्त हुन पनि प्रधानमन्त्रीलाई आग्रह गरे ।
नेता देउवाले बालुवाटारको सरकारीे जग्गा भूमाफियाको कब्जामा पुग्न लागेको तथ्य सार्वजनिक हुँदा पनि सरकार ढाकछोप गर्न लागिरहेको आरोप लगाए । 
उनले गल्ती, कमिकमजोरी सुधार गरेर अघि बढ्ने संकल्प गर्नुको सट्टा संविधानले स्थापित गरेको संघीय, लोकतान्त्रिक, गणतन्त्र र समावेशिताका संरचनालाई भत्काउने तर्फ सरकारको क्रियाकलाप केन्द्रीत भए त्यसको पार्टीले शसक्त प्रतिवाद गर्ने चेतावनी दिए ।