प्रधानमन्त्रीज्यू आफैँ न्यायाधीश नबन्नुसः नेपाली कांग्रेस

१८ वैशाख, हेटौँडा । प्रमुख प्रतिपक्षी दल नेपाली कांग्रेसले बालुवाटार जग्गा प्रकरणमा प्रधानमन्त्रीले दिएको अभिव्यक्तिप्रति आपत्ति जनाएको छ । कांग्रेसले सार्वजनिक जग्गा प्रकरणमा गम्भीर छानबिनका गरी दोषीमाथि कारबाहीको माग समेत गरेको छ ।
कांग्रेस प्रवक्ता विश्वप्रकाश शर्माले मंगलबार एक विज्ञप्ति जारी गर्दै प्रधानमन्त्री केपी शर्मा ओलीलाई न्यायाधीश नबन आग्रह गरेका छन् ।  
मंगलबार नेकपा संसदीय दलको बैठकमा प्रधानमन्त्री ओलीले जग्गा प्रकरणमा मुछिएका नेकपा महासचिव विष्णु पौडेलको बचाउ गरेका थिए । प्रधानमन्त्री ओलीले बैठकका क्रममा धेरैले किनबेच गरिसकेपछि जग्गा किनेका कारण महासचिव विष्णु पौडेलले बालुवाटारको जग्गा नहडपेको दावी गरेका थिए ।
कांग्रेसले भने प्रधानमन्त्रीले अमुक व्यक्तिको वकालत गरेको भन्दै बालुवाटारको जग्गा व्यक्तिका नाममा, कसरी पुग्यो, त्यसमा को संलग्न थिए र छन् भन्ने विवरण यसबीचमा तथ्य प्रमाणका साथ सार्वजनिक भइसकेको भन्दै ढाकछोप नगर्न चेतावनी दिएको छ । 
प्रवक्ता विश्वप्रकाश शर्माले जारी गिरिएको विज्ञप्तिमा दोषीलाई जोगाउने ढंगले, बिषयलाई ढाकछोप गर्ने, मोड्ने र विषयान्तर गर्ने ढंगले गरिने प्रचारहरुप्रति सजगताका लागि अपिल समेत गरिएको छ ।