बंशगोपाल वरिपरी 'जंक फुड' मा प्रतिवन्ध

१९ बैशाख, हेटौंडा । हेटौंडा-६ चौघडामा रहेको बंशगोपाल मावि वरिपरी जंक फुडमा प्रतिवन्ध लगाईएको छ । विद्यालय वरिपरीको १ सय मिटर क्षेत्रमा लागुपदार्थ, जंक फुड, सूर्तिजन्य र मदिराजन्य पदार्थ विक्रिमा प्रतिवन्ध लगाईएको हो ।

वडा अध्यक्ष अर्जुनप्रसाद चौलागाईंको नेतृत्वमा विद्यालय व्यवस्थापन समिति, शिक्षक, प्रहरी, विद्यार्थी र संचारकर्मीको टोलिले विद्यालय वरिपरीको क्षेत्रमा त्यस्ता सामग्री विक्रि नगर्न व्यवसायीलाई अाग्रह गरेका छन् । त्यस क्रममा व्यवसायी र सरोकारवालाहरूले पनि बिद्यालय वरिपरी त्यस्ता सामाग्री प्रयोग र विक्रि नगर्ने लिखित प्रतिवद्धता जनाएका थिए ।

यस्ता सामग्रीले बालबालिकाको स्वास्थ्यमा नकारात्मक प्रभाव पर्ने भएकाले प्रतिवन्धलाई कडाईका साथ लागू गरिने वडा अध्यक्ष अर्जुनप्रसाद चौलागाईंले बताए । बिद्यालय क्षेत्रमा त्यस्ता सामग्री विक्रि गरेको पाईए स्थानीय तहको समन्वयमा कार्वाही प्रक्रिया अघि वढाउने विद्यालयका प्रधानाध्यापक रमेशप्रसाद लामिछानेले जनाए । जंक फुड तथा सूर्ति र मदिराजन्य पदार्थ खरिद नगर्न विद्यार्थीलाई समेत सचेत गराईएको छ ।

बिद्यालयमा अंग्रेजी माध्यमा अध्यापन शुरू भएपछि विद्यार्थीको आकर्षण बढिरहेको विद्यालय व्यवस्थापन समितिले जनाएको छ ।