मनहरी दुर्घटना अपडेटः उपचारको क्रममा एकजनाको मृत्यु

२१ वैशाख, हेटौँडा । पूर्वपश्चिम राजमार्गअन्तर्गत मकवानपुरको मनहरी गाउँपालिका–९ स्थित जैसिङमा तीनवटा ट्रक एकसाथ ठोक्किँदा भएको दुर्घटनामा परि घाइते भएका मध्ये एकजनाको मृत्यु भएको छ । 
घाईते १३ जना मध्ये हेटौडा उपमहानगरपालिका वडा नम्बर ३ की २५ वर्षिय निर्माला राईको उपचारको क्रममा पुरानो मेडिकल कलेज भरतपुरमा मृत्यु भएको ईलाका प्रहरी कार्यलय मनहरीले जनाएको छ । २ जनाको अवस्था गम्भीर रहेको छ । 
हेटौंडाबाट नारयाण्गढतर्फ जाँदै गरेको ना ६ ख ३३७४ नम्बरको ट्रक र नारायणगढबाट हेटौंडातर्फ आइरहेको ना ४ ख ११९२ नम्बरको ट्रक आपसमा ठोक्किएका हुन् । दुई ट्रक ठोक्किएपछि नारायणगढतर्फबाटै आइरहेको ना ६ ख ९९०७ नम्बरको तेस्रो ट्रक पनि ठोक्किएर दूर्घटना भएको हो । दूर्घटनापछि केहीबेर राजमार्ग अवरुद्ध भएको थियो ।
दुर्घटनमा घाईते हुनेहरुमा हेटौडा उपमहानगरपालिका वडा नम्बर ३ का ३६ वर्षिया कृष्णमाया राई, सोहि स्थानका ५३ बर्षीय दिलमाया राई, २० वर्षिय शिला राई, मनहरी वडा नम्बर ६ का २६ वर्षिया कमला तामाङ, बर्ष २८ की धनमाया राई, बर्ष ५ का सनिल राई, हेटौडा उपमहानगरपालिका ८ कमाने निवासि १६ बर्षकी पुजा मुक्तान, धादिङ बस्ने बर्ष २० का सन्तोष बिडारी, कपिलबस्तु शिवराज नगरपालिका १ का १७ वर्षिय दिपक सुनार रहेको प्रहरीले जनाएको छ । 
घाइतेहरुको भरतपुर स्थित पुरानो मेडिकल कलेजमा उपचार भइरहेको छ । यस्तै मनहरी ६ लोथरका इरान लामा भने सामान्य उपचार पछि घर फर्केका छन । 
यसैगरी ना ६ ख ३३७४ नम्बरको ट्रक चालक रौतहट जिल्ला बस्ने बर्ष २७ को उमेस भुजेल र ना ६ ख ९७०७ नम्बरको ट्रक चालक दाङ बस्ने बर्ष ३५ को सरोज चौधरी पनि घाइते भएका छन् । 
प्रहरीका अनुसार ना ४ ख १९९२ नम्बरको ट्रक चालक भने फरार रहेका छन् ।