नेकपा बैठकः नीति तथा कार्यक्रमका विषयमा सांसदहरुकै असन्तुष्टि

२१ वैशाख, हेटौँडा । नेकपाका सांसदहरुले सरकारको नीति तथा कार्यक्रममा प्रस्तुत तथ्यांक र मेरो सरकार प्रयोगको सैद्धान्तिक आधार स्पष्ट पार्न नेतृत्वसंग माग गरेका छन् ।
शनिबार संघीय संसदभवनमा बसेको संसदीय दलको बैठकमा सासदहरुले सरकारको नीति तथा कार्यक्रमाथि स्पष्ट पार्न माग गरेका हुन् । 
‘बैशाख २४ गते सरकारको नीति तथा कार्यक्रम पास गर्न सहयोग गर्ने र २५ गतेदेखि बस्ने संसदीय दलको बैठकमा तपाईहरुले आ–आफ्नो धारण राख्न सक्नुहुनेछ’ भन्दै दलका उपनेता सुवास नेम्वाङ्गले भनेपछि अधिकांश सांसदहरुले नीति तथा कार्यक्रमकै बारेमा स्पष्ट पारिनुपर्ने माग गरेका थिए ।
उनीहरुले दुई नेताको निर्देशन र व्हीप मात्रै जारी गर्ने कुरा किमार्थ हुन नसक्ने भन्दै प्रधानमन्त्रीकै उपस्थितिमा आफुहरुलाइै जिज्ञासा राख्न दिनुपर्ने माग गरे । सांसदहरुले नीति तथा कार्यक्रममा प्रस्तुत भएका तथ्याांङ्क र भाषा प्रति बैठकमा स्पष्ट पार्नुपर्ने अडान लिएका थिए । 
सांसदहरु जनाद्र्धन शर्मा र रामकुमारी झाँक्रीले राष्ट्रपतिको सम्बोधनमा प्रयोग गरिएको मेरो सरकारको सैद्धान्तिक आधार र उद्देश्य स्पष्ट पार्न माग गरे । सांसद जनाद्र्धन शर्माले जुन भाषाको प्रयोगबाट राष्ट्रपतिलाई विवादमा ल्याईयो त्यो कुन मनसायले ल्याईउको थियो प्रष्ट पार्न माग गरे । 
यस्तै सांसद झाँक्रीले दलको बैठकमा कुरा राख्न नदिने अनि जबरजस्त यो कुरामा समर्थन गर भनेर निर्देशन दिन व्हीप मात्रै जारी गर्ने कुरा मान्न नसकिने बताईन । उनले बैठकमै छलफल गर्ने वातावरण हुनुपर्ने माग समेत गरिन । 
नीति तथा कार्यक्रममा प्रस्तुत गरिएका केही तथ्याङ्कहरु, त्यहाँ प्रयोग गरिएका केही भाषाका बारेमा प्रष्ट हुन चाहेको सांसद झाँक्रीले माग गरिन ।
सांसहरुले मेरो सरकार प्रयोग गरिएको भन्दै असन्तुष्ठी जनाएपछि प्रधानमन्त्री केपी शर्मा ओलीले राष्ट्रपतिको काम, कर्तव्य र अधिकारका बारेमा लामो प्रशिक्षण दिदै अन्तराष्ट्रिय अभ्यास भएकाले बहस आवश्यक नरहेको बताएका थिए ।