संघीय संसदमा नीति तथा कार्यक्रम माथीको छलफल सुरु 

२२ वैशाख, हेटौँडा । संघीय संसदमा सरकारको नीति तथा कार्यक्रम माथिको छलफल सुरु भएको छ । संघीय संसदको प्रतिनिधिसभाको आईतबार बसेको बैठकमा सरकारको नीति तथा कार्यक्रममाथिको छलफलमा सहभागी हुदै सांसदहरुले आ आफ्नो धारणा राखेका छन् । 
नेकपाका सांसद खगराज अधिकारीले सरकारले उन्नत रुपको नीति र कार्यक्रम ल्याएको भन्दै सरकारको बचाउ गरे । छिमेकी मुलुकमा पनि मेरो सरकार भन्ने परम्परा रहेको भन्दै उनले राष्ट्रपति सर्वोच्च निकाय भएकाले मेरो सरकार भनेको विषयमा आपत्ती जनाउनुपर्ने आवश्यकता नभएको तर्क राखे ।
यस्तै नेपाली कांग्रेसका सांसद दिलेन्द्र प्रसाद बडूले नीति तथा कार्यक्रममा उल्लेखित मेरो सरकार प्रति गम्भीर आपत्ती जनाउँदै राष्ट्रपतिको सम्बोधनले सरकारको गन्तव्य र उद्देश्य प्रति शंका उत्पन्न गराएको भन्दै सच्याउन माग गरे । उनले भ्रष्टाचार हुन दिन्न भन्ने सरकारले भ्रष्टाचारीलाई कारवाहीको दायरामा ल्याउन नसकेको  आरोप पनि लगाए ।
राजपाका सांसद लक्षमणलाल कर्णले मुलुकमा भईरहेका पछिल्ला घटनाले शान्ति कायम भएको भन्न नमिल्ने भन्दै कागजमा लेख्दैमा पृथकतावादको अन्त्य भई मुलुकमा शान्ति स्थापना भएको मान्न नसकिने तर्क गरे । 
यस्तै नेपाल मजदुर किसान पार्टीका सासद प्रेम सुवालले नीति तथा कार्यक्रममा १ बर्ष देखि ४ बर्ष सम्म पुरा हुने योजना मात्रै समेट्न, राजश्वको २० प्रतिशत पूँजीगत र ८० प्रतिशत विकास खर्चमा लगाउने प्रतिबद्धता गरिनुपर्ने धारणा राखेका थिए ।