प्रदेश १ को राजधानी विराटनगर नै बनाउने नेकपाको निर्णय

२२ वैशाख, विराटनगर । प्रदेश नम्बर १ को स्थायी राजधानी विराटनगर बनाउने सत्तारुढ दल नेपाल कम्युनिष्ट पार्टी (नेकपा) ले निर्णय गरेको छ । नेकपाको संसदीय दलको बैठकले यस्तो निर्णय गरेको हो । बैठकपछि नेकपाले स्थायी राजधानी विराटनगर बनाउने प्रस्ताव प्रदेशसभामा दर्ता गरेको छ ।
नेकपा संसदीय दलको निर्णयअनुसार राजधानी विराटनगर र कार्यपालिका, व्यवस्थापिकालगायतका संरचना इटहरी, विराटनगर र सुन्दरहरैंचा आसपास निर्माण गरिनेछ ।
उता प्रदेशसभा सचिवालयमा राजधानीका लागि ४ वटा प्रस्ताव दर्ता भएको छ । विराटनगरको पक्षमा २ वटा र धनकुटाको पक्षमा २ वटा प्रस्ताव दर्ता भएका छन् ।  सत्तारुढ दल नेकपा संसदीय दलका प्रमुख सचेतक बुद्धिकुमार राजभण्डारी प्रस्तावक र सांसदहरू लिलम बस्नेत, राजकुमार ओझा, विजयकुमार विश्वास, सावित्राकुमारी रेग्मी र यशोधा अधिकारी समर्थक रहेको प्रस्ताव दर्ता भएको छ ।
यसैगरी सत्तारुढ दल नेकपाकै धनकुटाका सांसद निरन राई प्रस्तावक रहेको र इन्द्रमणि पराजुली र कुसुम श्रेष्ठ समर्थक रहेको धनकुटा स्थायी राजधानी हुनुपर्ने दोस्रो प्रस्ताव दर्ता भएको छ । तेस्रो प्रस्ताव विराटनगरलाई प्रदेशको स्थायी राजधानी घोषणा गर्न माग गदै प्रमुख प्रतिपक्षी दल काँग्रेस संसदीय दलका प्रमुख सचेतक केदार कार्की प्रस्तावक र कांग्रेसकै सांसद शिवनारायण गनगाई र संघीय समाजवादी फोरम नेपाल संसदीय दलका नेता जयराम यादव समर्थक रहेको प्रस्ताव दर्ता भएको छ ।
चौथो प्रस्ताव कांग्रेसकै धनकुटाकी सांसद लीला सुब्बा प्रस्तावक र काँग्रेस ताप्लेजुङका सांसद प्रतापप्रकाश हाङगाम र संघीय समाजवादी फोरम नेपालका सांसद रामचन्द्र लिम्बुको समर्थनमा धनकुटा नै राजधानी हुनु पर्ने माग सहितको प्रस्ताव दर्ता भएको छ