धार्मिक पर्यटनबाट लाभ हासिल गर्न सकिन्छ : राज्यमन्त्री बानियाँ

१५ मंसिर, हेटौंडा । नवनियुक्त संस्कृति, पर्यटन तथा नागरिक उड्डयनमन्त्री ईन्द्रबहादुर बानियाँले धार्मिक पर्यटनबाट नेपालले लाभ हासिल गर्न सक्ने बताएका छन् । 
राज्यमन्त्री भएपछि संचारकर्मीहरूसंग प्रतिक्रिया दिंदै बानियाँले पशुपतिनाथ, लुम्बिनी, मुक्ति नाथ, स्वर्गद्वारी  लगायतका धार्मिक क्षेत्रको सम्बर्द्धन गर्न सके बढि भन्दा बढि धार्मिक पर्यटक भित्रने बताए । नेपाल पर्यटन, जलविद्युत र कृषिबाट समृद्ध बन्न सक्ने दावि गर्दै उनले कला, संस्कृतिको संरक्षण र पर्यटन प्रवर्द्धनमा अाफ्नो कार्यकाल खर्चने उनको भनाई छ ।   
उनले मठमन्दिर, पुरातात्त्विक महत्त्वका क्षेत्रको संरक्षणमा अाफ्नो भुमिका रहने बताए । उनले मकवानपुरको दामन, पालुङ, डाँडाबास, कैलाश, मकवानपुरगढी क्षेत्रको विकास गर्दै पर्यटन प्रवर्द्धन गर्नेतर्फ समेत अाफुले ध्यान दिने प्रतिबद्धता व्यक्त गरे ।

प्रतिकुल राजनीतिक अवस्थामा अाफु मन्त्री बनेको बताउँदै देश र जनताको हितमा काम गर्ने दावी गरे । उनले मकवानपुरबासीको अात्मसम्मान बढाउने ढंगले काम गर्ने समेत प्रतिक्रिया व्यक्त गरे । 
बानियाँ संस्कृति, पर्यटन तथा नागरिक उड्डयनमन्त्री भएसंगै जिल्लामा रहेका पुरातात्त्विक महत्वका क्षेत्र, धार्मिक एवम् पर्यटकिय क्षेत्रको विकास टेवा पुग्ने विश्वास मकवानपुरबासीले गरेका छन् ।