राष्ट्रिय सुरक्षामा खतरा बढ्यो : कमल थापा

१६ मंसिर, हेटौडा । राष्ट्रिय प्रजातन्त्र पार्टीका केन्द्रिय अध्यक्ष कमल थापाले पछिल्लो समय देशको राष्ट्रिय सुरक्षामा खतरा बढेर गएको बताएका छन् । 
राप्रपाले मकवानपुरको हेटौँडामा विहिबार गरेको संयुक्त कार्यकर्ता भेलामा बोल्दै अध्यक्ष थापाले देश टुक्र्याउन विखण्डनकारी शक्ति सक्रिय भएर लागेको भन्दै वेलैमा समस्या समाधान गर्न नसके राष्ट्रिय सुरक्षामा खतरा आउने बताए ।  ठूला राजनैतिक दलहरु समस्या समाधानमा भन्दा पनि कुर्सी र सत्ता केन्द्रित भएको उनको आरोप छ । आन्तरिक राजनीतिमा समेत बाह्य शक्तिको चलखेल बढेको भन्दै यसको अन्त्यका लागि राप्रपा बलियो शक्तिको रुपमा आएको थापाको भनाई छ ।
कार्यक्रममा राप्रपाका राष्ट्रिय अध्यक्ष पशुपति शम्सेर राणाले हरेक क्षेत्रमा राजनीतिकरण गरेर ठूला दलले देशलाई अस्तव्यस्त बनाएको बताए । उनले काँग्रेस र कम्प्युनिष्टले सत्तालाई देशको भन्दा पार्टीको स्वार्थमा प्रयोग गर्दा अर्थतन्त्र धरासायी भएको बताए । छिमेकी दुई देशले आर्थिक रुपमा फड्को पारेपनि नेपाल भने आर्थिक रुपमा कमजोर बन्दै जानुमा काँग्रेस र कम्प्युनिष्टको हात रहेको राणाको जिकिर थियो ।
कार्यक्रममा राप्रपाका बरिष्ठ नेता डा.प्रकाशचन्द्र लोहनी, केन्द्रिय सदस्य विक्रम पाण्डे लगायतले देशको बैकल्पिक शक्तिको रुपमा राप्रपा नेपाल आएको भन्दै जनताको समृद्ध नेपालको सपना पुरा हुने दावि गरे । कार्यक्रम राप्रपा मकवानपुरका कार्यवाहक अध्यक्ष शिबराम थापाको अध्यक्षतामा भएको थियो ।