प्रेस माथिको अंकुश लगाउने काम तत्काल बन्द होसः महासचिव विष्ट

२८ वैशाख, हेटौँडा । नेपाल पत्रकार महासंघले प्रेस तथा अभिव्यक्ति स्वतन्त्रता माथिको अंकुश लगाउने काम बन्द नभए अन्तर्राष्ट्रिय मिडिया मिसन बोलाउने चेतावनी दिएको छ । 
संसदमा दर्ता भएको मिडिया काउन्सिल विधेयकको प्रेस स्वतन्त्रता विरोधी प्रावधान बारे शनिबार रिपोर्टस क्लबमा आयोजित साक्षात्कारमा महासंघका महासचिव रमेश विष्टले प्रेस तथा अभिव्यक्ति स्वतन्त्रता विरोध प्रावधानहरु नसच्चिए अन्तराष्ट्रिय मिडिया मिसन बोलाउने चेतावनी दिए ।
विधेयक कानुनको रुपमा आईसकेपछि नेपालमा स्वतन्त्र पत्रकारिता रहदैन भन्नेमा महासंघ प्रस्ट रहेको भन्दै उनले सरकारको कदम विरुद्ध महासंघले भोली देखि साताव्यापी आन्दोलन घोषणा गरेको जानकारी गराउदै आन्दोलनबाट नसच्चिए अन्तर्राष्ट्रिय समुदायलाई बोलाउने चेतावनी दिए ।
महासचिव विष्टले सरकारले लोकतन्त्रको आवरणमा निरंकुशता लाद्न खोजेको आरोप पनि लगाए । विधेयकमा भएको व्यवस्था अनुसार मिडिया काउन्सिलको पदाधिकारी नियुक्तिले मिडिया काउन्सिलको स्वायक्ततालाई रक्षा नगर्ने भन्दै उनले काउन्सिल गठन प्रक्रिया र नियतमा खराबी देखिएको टिप्पणी गरे ।
दरबार र सेनासंग अधिकारका लागि लडेको महासंघको इतिहास बलियो रहेको भन्दै उहाँले अहिले पनि सरकारको निरंकुशता र प्रेसस्वतन्त्रता विरोधी कदमको डटेर प्रतिवाद गर्ने बताए ।
स्वतन्त्र पत्रकारिताको आवश्यकता नै नभएजस्तो गरेर प्रेसलाई नियन्त्रण गर्ने एक पछि अर्को कानुन सरकारले ल्याईरहेको भन्दै प्रेस स्वतन्त्रताको खातिर एकजुट हुन सबैलाई आव्हान समेत गरे ।
सरोकारवालाहरुसंग परामर्श र छलफल नै नगरि उनीहरुलाई छलेर विधेयक ल्याएबाट नै सरकारको नियत स्पष्ट भएको भन्दै उहँले  लेख्न र बोल्न पाउने संबैधानिक हक सुनिश्चित गर्नका लागि फेरी एक पटक संचारकर्मीहरु सडक संघर्षमा उत्रनु परेको दावी गरे ।
कार्यक्रममा प्रेस युनियनका अध्यक्ष बद्री सिग्देलले फेरी एकपटक प्रेस स्वतन्त्रताका लागि सडकमा उत्रनुपर्ने अवस्था आएको भन्दै सबैलाई सडक संघर्षमा ओर्लन आव्हान गरे । 
सरकारले संसदमा दर्ता गरेको मिडिया काउन्सिल सम्बन्धि विधेयकमा प्रेस र अभिव्यक्ति स्वतन्त्रता विरोधी प्रावधान राखिएको भन्दै पत्रकारहरुको साझा संगठन नेपाल पत्रकार महासंघले त्यस विरुद्धको आन्दोलन घोषणा गरिसकेको छ ।