निर्माण सामग्री व्यवसायी संघमा न्यौपाने 

२९ वैशाख, हेटौँडा । निर्माण सामग्री व्यवसायी संघ मकवानपुरको अध्यक्षमा कृष्णराम न्यौपाने चयन भएका छन् । निर्माण सामग्री व्यवसायी संघ मकवानपुरको आठौं बार्षिक साधारणसभा तथा चौथो अधिवेशनबाट न्यौपाने अध्यक्षमा सर्वसम्मत चयन भएका हुन् । न्यौपाने संघका संस्थापक अध्यक्ष समेत हुन् । 
यस्तै संघको उपाध्यक्षमा बालकृष्ण बजगाइँ, सचिवमा पुरुषोत्तम पौडेल, सहसचिवमा नारायणप्रसाद बर्तौला, कोषाध्यक्षमा स्वयम्भु शाक्य चयन भएका छन् । यसैगरी सदस्यहरुमा रोशन सापकोटा, सुदिप तिमल्सिना, मनु सिनुरिया बनियाँ, गोपाल श्रेष्ठ र हरिशचन्द्र बर्तौला चयन भएका छन् ।  संघका अध्यक्ष रवि नेपालको अध्यक्षतामा भएको कार्यक्रममा हेटौंडा उपमहानगरपालिकाका प्रमुख हरिबहादुर महतको प्रमुख आतित्थ्यता रहेको थियो । 
कार्यक्रममा बोल्दै महतले हेटौंडाको सडक साँघुरो हुँदा ट्राफिक व्यवस्थापनमा समस्या भएको बताउँदै सडक विस्तार गर्नुपर्ने बताएका थिए । उनले हेटौँडाको सडक सरकारले भत्काउन नसके उपमहानगरपालिकालाई अधिकार दिनु आग्रह समेत गरे । नगर निर्माणमा निर्माण व्यवसायीको भूमिका महत्पुर्ण हुने बताउँदै प्रमुख महतले उपमहानगरपालिकाले आयोजना गर्ने विकास निर्माणका काममा सहयोग गर्न आग्रह पनि गरे । 
प्रमुख महतले हेटौंडा नगरको विकासका लागि केही महत्वकांक्षी योजनाको डीपीआर तयार भैरहेको पनि जानकारी दिए । हेटौंडा–१० मा बस टर्मिनल र भ्यू टावरको डीपीआर अन्तिम चरणमा रहेको प्रमुख महतले बताए । यस्तै उनले सानोपोखराबाट मनकामना मन्दिरसम्म केवुल कार सञ्चालनको लागि निजी कम्पनीसंग सहकार्य भैरहेको पनि बताए । 
कार्यक्रममा मकवानपुर उद्योग वाणिज्य संघका अध्यक्ष कृष्ण कटुवा, उपाध्यक्ष रामप्रसाद न्यौपाने, निर्माण सामग्री व्यवसायी संघका सल्लाहकार अशोक शाक्य लगायतको उपस्थिति रहेको थियो ।