चुच्चेखोला वनको अध्यक्षका लागि पूर्व अध्यक्षहरू प्रतिष्पर्धामा

२९ बैशाख, हेटौंडा । मकवानपुरको पहिलो सामुदायिक वन चुच्चेखोला सामुदायिक वन उपभोक्ता समूहको अध्यक्ष पदका लागि २ जनाको उम्मेदवारी परेको छ । जेठ ४ गते हुने निर्वाचनमा अध्यक्षका लगि अर्जुनप्रसाद दाहाल र लक्ष्मण कटुवालको उम्मेदवारी परेको हो । 
अध्यक्ष पदका लागि उम्मेद्वारी दिएका दाहाल र कटुवालले २ पटक वन समितिको कार्यकाल चलाईसकेका छन् । कटुवाल वन समितिको पूर्व अध्यक्ष हुन् भने दाहाल निर्वतमान अध्यक्ष हुन् । तेश्रो कार्यकालका लागि ४ गते हुने निर्वाचनमा आफ्नो पक्षमा माहोल बनाउन दुवै अध्यक्ष पदका उम्मेद्वार लागि परेका छन् । दाहाल र कटुवालबिच यश अघि पनि एक पटक चुनावी प्रतिष्पर्धा भएको थियो । त्यो निर्वाचनमा दाहालले कटुवाललाई पराजित गरेका थिए । कटुवाल जवाफ फर्काउने दाउमा छन् भने दाहाल विजयलाई निरन्तरता दिने दाउमा छन् ।
त्यसैगरी  सहसचिव पदमा उमा दाहाल, झुलमाया राई र विदुर प्रसाद चौलागाईको उम्मेदवारी परेको छ । सामुदायिक वनलाई उपभोक्ताहरुको सहजताका लागि क्षेत्रगत रुपमा संयोजक चयन गरेर वन समितिले काम गरिरहेको छ । ६ वटा क्षेत्रमा वन समितिलाई छुट्याएको समूहका कार्यालय सचिव केदार गौतमले जानकारी दिए । ६ वटा क्षेत्रमध्ये ५ वटा क्षेत्रमा सर्वसम्मत संयोजक चयन भईसकेका छन् भने क्षेत्र नम्बर ३ का लागि निर्वाचन हुने भएको छ । 
क्षेत्र नम्बर तीनका लागि ५ जनाको उम्मेद्वारी परेको छ । चित्रकुमार गौतम, यतिन्द्र पुडासैनी, रोशन घिमिरे, उत्तम रिमाल र शंकर प्रसाद तिमलिसनाको ३ नम्बर क्षेत्रीय संयोजकको लागि उम्मेदवारी परेको हो । समूहको बाँकी रहेको पदमा भने बैशाख १३ गते भएको विशेष साधारण सभाबाट सर्वसम्मत रुपमा पदाधिकारी चयन भईसकेका छन् । उपाध्यक्षमा कल्पना पराजुली, सचिवमा सरिता खड्का गौतम, कोषाध्यक्ष राजन चौलागाई रहेका छन् । त्यसैगरी प्रदेश महिला संयोजकमा सावित्री तिमल्सिना, गोमा काफ्ले र कल्पना राई सर्वसम्मत चयन भएको निर्वाचन समितिका संयोजक गौरवकुमार पराजुलीले जानकारी दिए । 
त्यस्तै, १ नम्बर क्षेत्रीय संयोजकमा केदार पुडासैनी, २ मा श्रीलाल थिङ, ४ मा आनन्द प्रसाद सापकोटा, ५ मा अर्जुन बहादुर राई र ६ नम्बर क्षेत्रीय संयोजकमा केदार बहादुर बस्नेत सर्वसम्मत चयन भएका हुन् । त्यसैगरी समूहको लेखा समिति संयोजकमा श्यामलाल श्रेष्ठ र सदस्यहरुमा मन्दिरा घिमिरे र जयराम घिमिरे चयन भएका हुन् । 
हेटौंडा उपमहानगरपालिकाको ६, १६, १७ र मकवानपुर गढी गाउँपालिकाको २ र ३ नम्बर वडालाई यस वनले समेटेको छ । 
जेठ ४ गते हुने निर्वाचनमा १ हजार ९ सय मतदाताले आफ्नो मदाधिकार प्रयोग गर्ने कार्यालय सचिव केदार गौतमले बताए । जिल्लाकै उत्कृष्ट वन समूहको रुपमा रहेको चुच्चेखोला सामुदायिक वन समूहले २०७१ सालमा गणेशमान सिं वन संरक्षण दोश्रो राष्ट्रिय पुरस्कार प्राप्त गरिसकेको छ । २ सय ३८ हेक्टर क्षेत्रफलमा फैलिएको वन समूहले लोपोन्मुख सालकको संरक्षण गर्दै सालक पार्कको समेत निर्माण गरेको छ । 
सालक पार्क मकवानपुर जिल्लामा मात्रै नभई कान्तिलोकपथको यात्रा गर्ने देशभरका पर्यटकको लागि पर्यटकीय गन्तव्यको रुपमा समेत रहेको छ ।