विधेयकको विरुद्ध प्रेस युनियन मकवानपुरको विरोध (फोटो फिचर)

२ जेठ, हेटौँडा।मिडिया काउन्सिल गठनसम्बन्धी विधेयक र दर्ता हुन लागेको आमसञ्चार सम्बन्धी विधेयकले प्रेस स्वतन्त्रतालाई कुण्ठित गर्ने र संचारक्षेत्रलाई सरकारको भजनमण्डली बनाउने तथा आमसञ्चार विधेयकमा राखिएको प्रेस तथा अभिव्यक्ति स्वतन्त्रताविरोधी व्यवस्था हटाउनुपर्ने माग गर्दै नेपाल प्रेस युनियन मकवानपुरले प्रदेश ३को राजधानी हेटौँडामा विरोध प्रदर्शन गरेको छ ।  
हेटौंडा४ सिमाचोकबाट सुरु भएको विरोध प्रदर्शन  मकवानपुर उद्योग वाणिज्य संघमा पुगि पुनः सिमाचोकमा आएर कोणसभामा परिणत भएको थियो । कोणसभामा बोल्दै प्रेस युनियन मध्यमाञ्चल संयोजक तथा पत्रकार महासंघ मकवानपुरका पुर्वअध्यक्ष राममणि दाहालले सरकारले ल्याउन लागेको विधेयकमा व्यवस्था गरिएको जरिवाना तथा क्षतिपूर्ति सम्बन्धी व्यवस्थाले नेपालको स्वतन्त्र पत्रकारिताको घाँटी थिच्ने बताए । उनले उक्त विधेयकले सत्ता र शक्तिमा रहेकाहरुले संचारमाध्यम सरकारको भजनमण्डली बनाउन तयार भएको बताएका छन । 

त्यसैगरी कार्यक्रममा बोल्दै प्रेस युनियन मकवानपुरका अध्यक्ष कुमार अधिकारीले सरकारले ल्याउन लागेको विधेयक नसच्चिएसम्म आन्दोलन जारी रहने बताए ।प्रेस युनियनको मध्यमाञ्चल संयोजक राममणि दाहालको प्रमुख अतिथ्यतामा भएको विरोध कार्यक्रममा महासंघका प्रदेश ३ का उपाध्यक्ष नानी मैया कार्की(सम्झना) महासंघ मकवानपुरका अध्यक्ष हरि हुमागाई, प्रेस युनियनका पूर्व अध्यक्ष गोकर्ण सुवेदी, जिल्ला उपाध्यक्ष मणिराज गौतम, सचिव केशब सुवेदी लगायत युनियनमा आवद्ध सञ्चारकर्मीहरुको सहभागिता रहेको थियो । कार्यक्रम युनियनका अध्यक्ष कुमार अधिकारी पोष्टराजको अध्यक्षतामा भएको थियो ।

यसै क्रममा मिडिया काउन्सिल गठनसम्बन्धी विधेयकको विरुद्धमा   भोलि शुक्रबार नेपाल पत्रकार महासंघको आह्वानमा हेटौंडामा सञ्चार सामाग्री प्रदर्शन गरी प्रेस स्वतन्त्रताविरोधी विधेयक सच्याउन सरकारलाई दबाब दिने कार्यक्रम रहेको महासंघ मकवानपुरका अध्यक्ष हरि हुमागाईंले बताए । महासंघको अगुवाईंमा बुधबार मकवानपुरका सञ्चारकर्मीले हातमा कालोपट्टी बाँधेर काम गरेका थिए भने युनियन र महासंघले सरोकारवालासँग छुट्टाछुट्टै अन्तरक्रिया पनि गरेका थिए ।