चुच्चेखोला वनका नवनिर्वाचितले लिए सपथ

८ जेठ, हेटौंडा । हेटौंडा ६ चुच्चेखोलामा रहेको चुच्चेखोला सामुदायिक वन उपभोक्ता समूहका नवनिर्वाचित पदाधिकारीहरुले सपथ ग्रहण गरेका छन् । 
बुधबार एक कार्यक्रमका बीच निर्वाचन समितिका संयोजक गौरवकुमार पराजुलीले सपथ ग्रहण गराएका हुन् । निर्वाचन समितिका संयोजक पराजुलीको अध्यक्षतामा भएको सपथग्रहण तथा प्रमाण पत्र वितरण कार्यक्रममा डिभिजन वन कार्यालयका प्रमुख इमनाथ पौडेलको प्रमुख आतिथ्यता रहेको थियो । कार्यक्रममा बोल्दै पौडेलले नवनिर्वाचित कार्यसमितिलाई वन क्षेत्रको संरक्षणमा दत्तचित्त भएर लाग्न आग्रह गरे । समुदायसंग प्रत्यक्ष रुपमा सहकार्य गर्दै सामुदायिक वन समूहहरु अघि बढ्नुपर्ने उनको धारणा थियो । 
कार्यक्रममा नवनिर्वाचित अध्यक्ष अर्जुनप्रसाद दाहालले राष्ट्रिय स्तरमा ख्याती कमाईसकेको वनलाई अन्तर्राष्ट्रिय जगतमा चिनाउन पहल गर्ने बताए । सालक संरक्षणका लागि वनले चालेको कदमलाई थप व्यवस्थित बनाउँदै निरन्तरता दिने उनले बताए । तीनै तहको सरकारसंग समन्वय गर्दै हरियो वन नेपालको धन मात्र नभई विपन्न र निमुखाको पनि धनको रुपमा सामुदायिक वनलाई अघि बढाउने उनले बताए ।
कार्यक्रममा हेटौंडा ६ का वडा अध्यक्ष अर्जुनप्रसदा चौलागाई, मकवानपुर गढी गाउँपालिका वडा नम्बर २ का अध्यक्ष वखान सिं पाख्रीन, ३ का अध्यक्ष भागवत घिमिरे, सामुदायिक वन उपभोक्ता महासंघ मकवानपुरका अध्यक्ष साधुराम चौलागाई लगायतले मन्तव्य  व्यक्त गरेका थिए ।