धार्मिक पर्यटनका लागि मकवानपुर उपयुक्त : राज्यमन्त्री बानियाँ

२० मंसिर, हेटौँडा । संस्कृति, पर्यटन तथा नागरिक उड्डयन राज्यमन्त्री ईन्द्रबहादुर बानियाँले मकवानपुर धार्मिक पर्यटनका लागि उपयुक्त जिल्ला भएको बताएका छन् ।
हेटौँडा–१९ चिसापानीस्थित शक्तेश्वर मन्दिर स्तोरोन्नतिका लागि सोमबार शुरु भएको महायज्ञको उद्घाटन गर्दै राज्यमन्त्री बानियाँले मकवानपुरका धार्मिक क्षेत्रहरुको विकास गर्न सके पर्यटक भित्र्याउन सकिने बताए । उनले मकवानपुर गढीस्थित बंशगोपाल मन्दिर, त्रिखडेश्वर महादेव मन्दिर, चिसापानी गढी, पाथीभारा, त्रिवेणीधाम, पुण्यक्षेत्र, चुरियामाई लगायतका क्षेत्रको विकास गर्न सके धार्मिक पर्यटनबाट लाभ हासिल गर्न सकिने बताए ।
उनले धार्मिक क्षेत्रको विकासमा राजनीति नगर्न आग्रह गर्दै धर्मका नाममा हुने राजनीतिले विकृति बढ्नेतर्फ सचेत रहन सुझाव दिए । मकवानपुरलाई पर्यटकिय जिल्लाको रुपमा विकास गर्न सबै क्षेत्रको समन्वय आवश्यक रहेको बताउँदै राज्यमन्त्री बानियाँले आफ्नो कार्यकालमा जिल्लाका लागि समेत उदाहरणिय काम गर्ने प्रतिवद्धता व्यक्त गरे ।
उनले सिमरा र भरतपुरमा जाडोयाममा हुस्सुका कारण विमान अवतरणमा समस्या पर्ने भएकाले उपयुक्त वातावरण रहेको मकवानपुरमा आकस्मिक अवतरणका लागि विमानथलको प्रस्ताव अघि बढाउने बताए । उनले शक्तेश्वर मन्दिर क्षेत्रको विकासका लागि आफ्नो मन्त्रालयबाट सक्दो सहयोग गर्ने बताउँदै प्रस्तावसहित आउन आग्रह गरे ।
यसअघि महायज्ञस्थलबाट शुरु भएको कलश र पञ्चेबाजासहितको शोभायात्रा रंगशाला, हात्तिलेट, पुतलीबजार, बंशगोपाल मन्दिर पुगेर पुनः महायज्ञस्थल फर्किएको थियो । महायज्ञ मूल समारोह समितिका संयोजक लोकनाथ चौलागाईको अध्यक्षतामा भएको कार्यक्रममा सहसंयोजक रामकृष्ण कोइराला, गोविन्द दाहाल लगायतले मन्तव्य व्यक्त गरेका थिए । कार्यक्रममा विभिन्न राजनैतिक दलका प्रतिनिधि, सामाजिक एवं धार्मिक संघसंस्थाका प्रतिनिधिको सहभागिता रहेको थियो ।