बार्षिकोत्सवमा हेटौँडा ६ नम्बर वडाद्वारा समिक्षा

१२ जेठ, हेटौँडा । हेटौँडा उपमहानगरपालिका ६ नम्बर वडा कार्यालयले बार्षिकोत्सवमा आफ्नो समिक्षा गरेको छ ।
जनप्रतिनिधिको रुपमा सपथग्रहण गरेको २ बर्ष पुरा गरेको अवसरमा वडा कार्यालयमा जनप्रतिनिधिहरुले आफ्नो कार्यकालको समिक्षा गरेका हुन् । कार्यक्रममा बोल्दै वडा अध्यक्ष अर्जुनप्रसाद चौलागाईले आफुहरुको २ बर्षे कार्यकाल जनहितमा खर्चिएको बताए । लामो समयदेखिको जनप्रतिनिधिको रिक्ततालाई पूर्ति गर्ने गरी काम अघि बढाएको बताउँदै उनले चालु आर्थिक बर्षमा शुरु गरिएका सम्पूर्ण योजना सतप्रतिशत सम्पन्न गरेको बताए । उनले जनप्रतिनिधि आएपछि वडाको विकासले तिब्रता लिएको बताउँदै कार्यालय व्यवस्थापन, पूर्वाधार विकास र सामाजिक विकासमा वडा कार्यालयले काम गरेको दावि गरे । उनले विभिन्न क्षेत्रमा सडक कालोपत्रे, ढलान, खानेपानी, विद्युतिकरण लगायतका काम गरिरहेको भन्दै आगामी दिनमा पनि जनताको मागको आधारमा योजना अघि बढाउने प्रतिवद्धता व्यक्त गरे ।
उनले आगामी आर्थिक बर्षमा चौघडा मक्रान्चुली सडक, विपि गणेशमान शान्ति पार्क, भुमिगत सिंचाई, बंशगोपाल प्राविधिक शिक्षालय, रामनगरमा बाल उद्यान, कर्राखोला तटबन्ध, नमूना लिंक रोड, चौघडा हेल्थपोष्टको स्तरोन्नति जस्ता योजनामा प्रदेश सरकारसंग बजेटमा माग गरेको जानकारी दिए ।
उपमहानगरपालिकाबाट प्राप्त सिलिङको आधारमा वडाको विकासका लागि सरोकारवालाहरुसंगको समन्वयका आगामी आर्थिक बर्षको योजना बनाईने चौलागाईले बताए । कार्यक्रममा वडा सदस्य राजकुमार बास्तोला, शुभद्रा तिमल्सिना, रामहरी राई, वडा सचिव आमोद मैनाली, विभिन्न संघसंस्थाका पदाधिकारी, संचारकर्मी लगायतको उपस्थिति रहेको थियो ।