दुई तिहाईको सरकार निद्रामा बर्बराउने गर्छ : केसी

१२ जेठ, हेटौँडा । नेपाली कांग्रेसका केन्द्रीय सदस्य एवं पूर्वमन्त्री अर्जुननरसिंह केसीले ओली नेतृत्वको दुईतिहाईको सरकार निन्द्रामा बर्बराउने गरेको बताएका छन् । 
नेपाली कांग्रेस हेटौंडा उपमहानगर समितिको आयोजनामा आईतबार पदमपोखरीमा भएको जागरण अभियानमा बोल्दै नेता केसीले दम्भका कारण वर्तमान सरकार वेहोसीमा पुगेको भन्दै निन्द्रामा पनि बर्बराउने गरेको बताए । उनले दम्भका कारण वर्तमान सरकारले जतिबेला जे पनि गर्न सक्ने भएकाले तयार अवस्थामा रहन कार्यकर्ताहरुलाई सचेत गराए । वर्तमान सरकारको गलत कामको प्रतिवाद गर्न कांग्रेस सक्षम रहेको भन्दै यसका लागि तयारी अवस्थामा रहन कार्यकर्ताहरुर्लाइ केसीको आग्रह थियो । 
उनले नेपालमा कांग्रेसको विकल्पमा कुनै पार्टी र शक्ति नरहेको भन्दै कांग्रेसकै नेतृत्वमा तीनवटा ठूला ऐतिहासिक आन्दोलन गरेर देशलाई यो स्थानमा ल्याएको बताए । कम्युनिष्ट सरकारले नेपालको कानून र संविधान मिच्दै गरेका गलत निर्णय, वाईडबडीदेखि जलविद्युतसम्म व्यापक भ्रष्टाचार, हत्या हिंसा एवं बलात्कारलाई प्रश्रय मात्रै दिएको उनको भनाई छ । उनले यसबारे आम जनतालाई जानकारी दिने र सरकारलाई खबरदारी गर्न जागरण अभियान थालेको उनको भनाई छ ।
कार्यक्रममा नेपाली कांग्रेसकी केन्द्रीय सदस्य महालक्ष्मी उपाध्याय डिनाले कम्युनिष्ट सरकार निरंकुशतातर्फ जाने हो भने विश्वबाट पलायन भएको कम्युनिष्ट शासन नेपालबाट पनि पलायन भएर जाने बताए । कांग्रेस मकवानपुरका सभापति एवं कांग्रेस ३ नम्बर प्रदेश संसदीय दलका नेता ईन्द्रबहादुर बानियाँले कांग्रेसले राणा, पञ्चायत र राजा फाल्दै जंगलमा हतियार लिएर जनता तर्साउँदै बसेको माओवादीलाई समेत संसदमा ल्याई संविधान ल्याउन र निर्वाचन गराउन सफल भएको बताए । 
नेपाली कांग्रेस हेटौंडा उपमहानगर समितिका सभापति आनन्दराम पराजुलीको सभाध्यक्षता भएको कार्यक्रममा पार्टी जिल्ला सदस्य एवं तरुण विभाग प्रमुख अर्जुन तिवारीले मन्तव्य व्यक्त गरेका थिए । जागरण अभियान कार्यक्रममा विभिन्न पार्टी परित्याग गरी ४ सय ३७ जना नेपाली कांग्रेसमा प्रवेश गरेका छन् ।