विप्लव समूहका गतिविधि अपराधिकः गृहमन्त्री थापा

१३ जेष्ठ, हेटौँडा । गृहमन्त्री रामबहादुर थापा बादलले नेत्रविक्रम चन्द विप्लव समूहले काठमाण्डौ उपत्यकालाई निशाना बनाएर अपराधिक गतिविधि सञ्चालन गरेको बताएका छन् ।
प्रतिनिधिसभाको बैठकमा विशेष समय लिएर बोल्दै गृहमन्त्री थापाले सोमबार राजधानी काठमाडौँमा भएको घटनाको बारेमा जानकारी गराए । 
पछिल्लो समय विप्लव समूहले काठमाण्डौ उपत्यकालाई आधार बनाएर आपराधिक क्रियाकलाप गरिरहेको र आइतबार ४ जनाको ज्यान जानेगरी भएको बम विष्फोट पनि त्यसैको निरन्तरता भएको गृहमन्त्री थापाले जानकारी दिए । 
विप्लवले गैह्रकानुनी र संविधान विपरित जनसरकारको रुपमा जनपरिषद् गठन गरेको र जनसेनाको रुपमा ४ वटा कम्पनी बनाएकाले सुरक्षा चुनौति थपिएको गृहमन्त्री थापाको भनाइ छ । 
मन्त्री थापाले विप्लब समुहले मुलुकको शान्ति र स्थायीत्वलाई प्रभाव पार्ने गरि क्रियाकलाप अघि बढाएको उल्लेख गर्दे त्यस तर्फ सरकार सजग रहेको दावी गरे ।
सरकारले चन्द समूहका गतिविधिलाई प्रतिबन्ध लगाइसकेकाले उनीहरुविरुद्ध थप कडा रुपमा प्रस्तुत हुने पनि उल्लेख गरे । उनले अपराधिक गतिविधिमा संलग्न पक्राउ गरी कानुनी कठघरामा ल्याउन सरकारले कुनै कसर बाँकी नराख्ने दावी पनि गरे । यस्तै गृहमन्त्री थापाले सोमबारको घटनामा मारिने विप्लवका कार्यकर्ता भएको पनि जानकारी दिएका थिए ।