नीति तथा कार्यक्रम बहुमतले पारित, संशोधन अस्विकृत

१७ जेठ, हेटौँडा । ३ नम्बर प्रदेशको नीति तथा कार्यक्रम बहुमतले पारित भएको छ । सरकारको तर्फबाट प्रदेश प्रमुख अनुराधा कोइरालाले जेठ १४ गते प्रस्तुत गरेको आव ०७६/०७७ को नीति तथा कार्यक्रम शुक्रबार बहुमतले पारित भएको हो । 
सभामुख सानुकुमार श्रेष्ठले नीति तथा कार्यक्रम निर्णयार्थ प्रस्तुत गर्दा प्रमुख प्रतिपक्ष दल नेपाली कांग्रेससहितका दल विपक्षमा उभिएपछि नीति तथा कार्यक्रम बहुमतले पारित भएको छ । नीति तथा कार्यक्रममाथि परेको ६ वटा संशोधन प्रस्ताव पनि बहुमतले अस्विकृत भएको थियो । 
सभामुख सानुकुमार श्रेष्ठले प्रस्ताव फिर्ता लिन आग्रह गरेपनि संशोधनकर्ता प्रदेशसभा सदस्यहरु नरोत्तम बैद्य, विजया श्रेष्ठ केसी, रमेश पौड्याल, शोभा शाक्य, रिता माझी र रिना गुरुङले फिर्ता नलिने जनाएपछि निर्णयार्थ प्रस्तुत हुँदा संशोधन पनि अस्विकृत भएको थियो । 
यसअघि नीति तथा कार्यक्रममा प्रदेशसभा सदस्यहरुको धारणाको जवाफ दिंदै मूख्यमन्त्री डोरमणी पौडेलले सुझाव सकारात्मक रहेको बताएका थिए । उनले विगतको समिक्षा र आगामी बर्ष काम गर्ने संकल्पका साथ नीति तथा कार्यक्रम ल्याईएको बताएका थिए । नीति तथा कार्यक्रममाथि विहिबार ५१ जना प्रदेशसभा सदस्यहरुले आफ्नो धारणा प्रस्तुत गरेका थिए ।