प्रधानमन्त्री कपः नेपाल पुलिस क्लब सेमिफाइनलमा प्रवेश

१९ जेष्ठ, हेटौँडा । काठमाडौँमा जारी प्रधानमन्त्री कप एक दिवसीय क्रिकेट प्रतियोगितामा नेपाल पुलिस क्लब सेमिफाइनलमा प्रवेश गरेको छ । 
कीर्तिपुर मैदानमा आइतबार भएको खेलमा प्रदेश २ लाई १५६ रनले पराजित गर्दै पुलिस सेमिफाइलनमा पुग्न सफल भएको हो । 
पुलिसले दिएको २५४ रनको लक्ष्य पछ्याएको प्रदेश दुई २९ ओभरमा सबै विकेट गुमाउँदै ९७ रनमा अल आउट भयो । प्रदेश २ लाई सस्तैमा अल आउट गराउन दीपेन्द्रसिंंह ऐरीले सर्वाधिक ५ विकेट लिए । 
यसैगरी अर्का बलर ललितनारायण राजबंशीले तीन विकेट हात पारे भने कुशल भुर्तेल र सागर ढकालले पनि समान एक÷एक विकेट लिए ।
प्रदेश २ का लागि हरिशंकर साहले २९ रन जोड्दा कप्तान मेहबुब आलमले २१ रनको पारी खेले । यस्तै रवि साहले १५ रन बनाउँदा सुरज पटेलले १२ रनको योगदान गरे । 
टस जितेर पहिले ब्याटिङ गरेको पुलिसले ५० ओभरमा नौ विकेट गुमाउँदै २५३ रन बनाएको थियो । बलियो सुरुवात गरेको पुलिसले पहिलो विकेटका लागि ८७ रनको साझेदारी गरेको थियो । 
पुलिसका लागि सुनिल धमलाले ४३ तथा अनिल शाले ३७ रन बनाए । यस्तै अमित श्रेष्ठले ५०, दिपेन्द्र ऐरीले १८ तथा पवन सराफले १३ रनको योगदान गरे । त्यस्तै आरिफ शेखले ३२ तथा कुशल भुर्तेलले ३५ रन योगदान गरे । 
बलिङमा संसद शेखले चार तथा रासिद खानले दुई विकेट हात पारे । जवाफमा २९ ओभरमा ९७ रनमा अलआउट भएको प्रदेश २ ले आठ रनमा पहिलो  र ४९ रनमा दोस्रो विकेट खेर फालेको थियो । 
उसका मध्यक्रमका खेलाडीले राम्रो खेल्न नसक्दा १५६ रनको अन्तरले पराजित भयो । समुह ’बी’ बाट नेपाल पुलिस विजेता र आर्मी उपविजेताका रूपमा सेमिफाइनलमा पुगेका छन् ।