प्रधानमन्त्री कपः आर्मी फाइनलमा प्रवेश

२२ जेष्ठ, हेटौँडा । विभागीय टिम त्रिभुवन आर्मी प्रधानमन्त्री कप एकदिवसीय क्रिकेट प्रतियोगिताको फाइनलमा प्रवेश गरेको छ ।
बुधबार भएको सेमिफाइनलमा प्रदेश ३ लाई ११७ रनको भारी अन्तरले हराउँदै आर्मीले फाइनलमा स्थान बनाएको हो । कीर्तिपुर क्रिकेट मैदानमा टस हारेर ब्याटिङको निम्तो पाएको आर्मीले ५० ओभरमा ६ विकेट गुमाउँदै तीन सय नौ रन बनायो । 
आर्मीका लागी विनोद भण्डारीले ७५, राजु रिजालले ५१, रोहितकुमार पौडेलले ४३ रन बनाए भने हरि चौहानले ३८, राजेश पुलामीले २९, कुशल मल्लले २६ तथा करण केसीले २१ रन बनाए । 
बलिङतर्फ प्रदेश नम्बरमा ३ का लागि नन्दन यादव र जितेन्द्रसिंह ठकुरीले समान दुई÷दुई विकेट लिए । 
३ सय १० रनको लक्ष्य पछ्याउँदै जवाफी ब्याटिङमा उत्रिएको प्रदेश तीन ५० ओभरमा नौ विकेट गुमाउँदै एक सय ९२ रनमा सीमित भयो । 
सुरुवात राम्रो गर्न नसकेको प्रदेश ३ ले १३ रनमा पहिलो विकेट गुमाएको थियो । त्यसपछि ४८ रनमा तीन विकेट खेर फालेको प्रदेश ३ का लागि कुनै पनि खेलाडीबीच राम्रो प्रदर्शन गर्न सकेनन् ।
प्रदेश ३ का लागि इसान पाण्डेले अविजीत ७९ रन बनाउँदा कप्तान पारस खड्का १९, ज्ञानेन्द्र मल्ल २६ तथा आदिल खानले १५ रनको योगदान दिए । 
अन्तिममा इसान र नन्दन यादवले नवौं विकेटका लागि अर्धशतकीय साझेदारी गरे पनि टिमको हार टार्न सकेनन् ।
बलिङमा आर्मीका साहव आलमले तीन विकेट हात लिए । अब उपाधिका लागि आर्मीले एपीएफ र नेपाल पुलिसबीचको विजेतासँग खेल्नेछ ।