प्रदेश सरकार हो कि इकाई छुट्याउन गाह्रो : बानियाँ

२२ जेठ, हेटौँडा । ३ नम्बर प्रदेशको प्रमुख प्रतिपक्ष दलका नेता ईन्द्रबहादुर बानियाँले ३ नम्बर प्रदेश सरकार आफैंमा सरकार हो कि संघीय सरकारको इकाई हो छुट्याउन गाह्रो परिरहेको बताएका छन् । 

जनता टेलिभिजनद्वारा हेटौँडामा गरेका पूर्व बजेट छलफल कार्यक्रममा बोल्दै उनले प्रदेश सरकारदेखि संघीय सरकारसम्मले यसलाई इकाईको रुपमा संचालन गर्न खोजेको भन्दै आपत्ति जनाए । संघीयता कार्यान्वयन गर्ने हो भने प्रदेश सरकारलाई अधिकार सम्पन्न बनाउन संघीय सरकार र प्रदेश सरकार दुबैले काम गर्नुपर्ने बताए । प्रदेश सरकारले समेत आफुलाई बलियो ढगबाट प्रस्तुत गर्नुपर्नेमा केन्द्रकै इकाईको रुपमा प्रस्तुत गरिरहेको बताए ।

उनले आव ०७६/०७७ को प्रदेशको नीति तथा कार्यक्रम  नेतामुखी र कार्यकर्तामुखी रहेको बताए । पूर्णकालिन म्यान्डेटसहित दुई तिहाई प्राप्त प्रदेश सरकारले दिगो विकासको अवधारणा अघि सानुपर्नेमा जोड दिंदै उनले नेताहरुको नाममा योजना ल्याउँदैमा समृद्धि नआउनेतर्फ ध्यान दिनुपर्ने बताए । संघीय सरकार अन्तरगतको नेपाल प्रहरीलाई बजेट विनियोजन गर्नु संविधान विपरित भएको भन्दै उनले प्रदेश सरकारलाई संविधान विपरितको काम बन्द गर्न सुझाव दिए ।

कार्यक्रममा आर्थिक मामिला तथा योजनामन्त्री कैलाश ढुंगेलले प्रदेश सरकारले आगामी आवका लागि ल्याएको नीति तथा कार्यक्रम सकारात्मक लक्ष्यका साथ अघि बढेको बताए । उनले नीति तथा कार्यक्रमबाटै प्रदेश समृद्ध हुने दावि समेत बताए । कार्यक्रममा नीति क्षेत्रका व्यक्तित्वहरुको समेत सहभागिता रहेको थियो ।