गुठि विधेयकको प्रदेशसभामा चर्को विरोध

३१ जेठ, हेटौँडा । ३ नम्बर प्रदेशसभाको शुक्रबार बसेको बैठकमा प्रदेशसभा सदस्यहरुले संघीय संसदमा पेश भएको गुठी विधेयकको चर्को विरोध गरेका छन् । प्रदेशसभाको विशेष समयमा बोल्ने सत्तापक्ष र प्रतिपक्ष दुबैतर्फका प्रदेशसभा सदस्यहरुले विधेयकको विरोध गरेका हुन् ।
बैठकमा प्रदेशसभा सदस्य राजकाजी महर्जनले गुठि विधेयक संस्कृति, परम्परा र मुटुमाथिको प्रहार भएको बताए । उनले गुठी संस्थाले २०२१ सालदेखि धर्म संस्कृतिमाथि प्रहार जारी रहेको भन्दै विधेयक यसको अन्तिम रुप भएको बताए । उनले ठेकेदारलाई कम्पनीमार्फत संचालन गर्न दिएर संस्कृति, परम्परा नजोगिने उनले बताए । प्रदेशसभा सदस्य नरोत्तम बैद्यले संविधान विपरित विधेयक आएको भन्दै यसको खारेजीको माग गरे । 
संविधानको अनुसुचि ६ अनुसार गुठिको व्यवस्थापन प्रदेश सरकारमार्फत हुनुपर्नेमा संघीय सरकारले हस्तक्षेप गर्न खोजेको भन्दै आफ्नो अधिकार लिन प्रदेश सरकारको ध्यानाकर्षण गराए । उनले आफुलाई ‘दाजु जिल्ला विकास समिति’ कै भुमिकामा कायम नराख्न प्रदेश सरकारसंग आग्रह गरे । 
बैठकमा प्रदेश सांसद बसन्त मानन्धरले गुठि विधेयक नेपालको संविधान २०७२ को धारा २९० र अनुसुचि ६ को बुँदा २१ को उल्लंघन भएको बताए । त्यस्तै सांसद राजेश शाक्यले गुठी विधेयक विरुद्धको आन्दोलनले हिंसात्मक रुप नलियोस् भन्नेतर्फ संघीय सरकार सचेत रहनुपर्नेमा जोड दिंदै  विधेयकको दफा २३,२४ र २५ धातक रहेको बताए । संसमा विधेयको विरोधमा सांसद पुकार महर्जन, रिता माझी, शोभा शाक्य, विराजभक्त श्रेष्ठले आफ्नो धारणा राख्दै विरोध फिर्ताको माग गरेका थिए । 
उता, नेकपाका मूख्य सचेतक रामेश्वर फुँयालले गुठी पुरानै ढंगले संचालन हुन नसक्ने बताउँदै परिस्कृत र परिमाजन आवश्यक रहेको बताए । सांसद सरेश नेपालले गुठि विधेयक पुरानो भएको बताउँदै गुठिका जग्गा संरक्षणका लागि पनि विधेयक आवश्यक रहेको बताए । 
बैठकमा सांसद रमेश पौड्याल, सन्तबहादुर प्रजा, ओमबहादुर ग्लान लगायतले समसामयिक विषयमा धारणा राखेका थिए ।