न्यायमा पहुँच अभिबृद्धिका लागि धेरै काम गर्न बाँकी : प्रधानन्यायाधिश कार्की

२७ मंसिर, काठमाण्डौ । सर्वोच्च अदालतकी प्रधानन्यायाधीश सुशिला कार्कीले न्यायमा पहुँच अभिबृद्धिका लागि धेरै काम गर्न बाँकी रहेको बताएकी छिन् ।

सोमबार हेटौँडामा भएको 'न्यायमा पहुँच अभिबृद्धिका लागि सरोकारवालाहरुको भूमिका' विषयक कार्यक्रममा बोल्दै प्रधानन्यायाधीश कार्कीले अझैं पनि ग्रामिण भेगमा अदालती प्रक्रियाबारे अवगत नरहेको भन्दै जनचेतना अभिबृद्धिका लागि सरोकारवाला निकायले समनवय गर्नु जरुरी रहेको बताईन् । उनले जघन्य अपराधका घटनामा पनि गाउँमै मिलापत्र गर्ने क्रम नघटेको भन्दै न्यायमा पहुँच अभिबृद्धि हुन नसक्दा यस्तो समस्या समाजमा रहेको बताईन् ।

अदालती प्रक्रिया जटिल र महंगो रहेको गुनासो रहेको भन्दै उनले छिटो छरितो न्याय सम्पादन हुँदा मात्रै पीडितले न्याय पाउने बताईन् । उनले यसका लागि न्याय प्रशासनमा सुधारको खाँचो रहेको बताईन् । महिला, बालबालिका, पछि पारिएका नागरिकको न्यायिक अधिकार सुरक्षित गर्न सबै पक्षको समन्वय आवश्यक रहेको उनको भनाई थियो ।

उच्च अदालत पाटन, हेटौँडा इजलासका न्यायधिश बाबुराम रेग्मीको अध्यक्षतामा भएको कार्यक्रममा न्यायधीश नागेन्द्रलाभ कर्ण, मध्यमाञ्चल क्षेत्रीय प्रशासक विनोद केसी, प्रमुख जिल्ला अधिकारी नारायणशर्मा दुबेडी, संघसंस्थाका प्रतिनिधि, कानून व्यवसायी लगायतको सहभागिता रहेको थियो ।