विदेशी कुटनितिकज्ञहरुको हस्तक्षेप बढ्योः सांसद शर्मा

२ असार, हेटौँडा । नेपालस्थित विभिन्न मुलुकका राजदुतहरुले नेपालको शान्ति प्रक्रियाका बारेमा बोल्दा  पनि त्यसबारे परराष्ट्रमन्त्रालयले कुनै प्रतिक्रिया नजनाएकोमा सत्तारुढ दल नेकपाका सांसद जनार्दन शर्माले असन्तुष्टी जनाएका छन् । 
नेता शर्माले त्यसतर्फ सरकारको ध्यान गएको छ कि छैन भन्दै विदेशी कुटनितिकज्ञहरुबाट हुने हस्तक्षेपकारी कार्य रोक्न सरकारसगँ माग गरे । 
प्रतिनिधिसभाको सोमबारको बैठकमा विनियोजित विधेयक २०७६ माथिको छलफलका क्रममा बोल्दै नेता शर्माल बजार नियन्त्रित अर्थतन्त्रको नाममा सबै बजारलाई छाडा छोड्ने काम भएको भन्दै सम्बन्धीत मन्त्रालयको ध्यानाकर्षण गराए ।
सांसद शर्माले विश्वव्यापिकरण लगायतका नाममा सबै बजार छाडा छाड्ने काम भएको भन्दै अनुगमन, नियन्त्रण र नियमन गर्न उद्योग वाणिज्य तथा आपूर्ति मन्त्रालयको ध्यानाकर्षण गराएका हुन् । उनले अखाद्य वस्तु आयातमा रोक लगाउन पनि माग गरे ।
यस्तै नेता शर्माले असंलग्न परराष्ट्रनीतिलाई व्यवहारिक रुपमा कार्यान्वयन गर्न पनि सरकारको ध्यानाकर्षण गराएका छन् । 
असंलग्न परराष्ट्रनीति स्पष्ट नभएकाले जनता दोधारमा परेको भन्दै उनले सरकारको दृष्टिकोण स्पष्ट पारिनुपर्ने बताए । कतै पनि नढल्किईकन दृढतापुर्वक राष्ट्रिय हितमा उभिनुपर्नेमा उनले जोड दिए । फोटोः गुगल