खेलकुद पत्रकार मञ्चले प्रदान गर्ने स्पोर्टस अवार्डको मनोनयन सार्वजनिक 

१० असार, हेटौँडा । नेपाल खेलकुद पत्रकार मञ्चले हरेक बर्ष आयोजना गर्दै आएको पल्सर स्पोर्टस अवार्ड २०७५ को मनोनयन सार्वजनिक गरेको छ । 
मंगलबार काठमाडौंमा पत्रकार सम्मेलन गरी सार्वजनिक गरेको उत्कृष्ट खेलाडी प्रशिक्षकको मनोनयनमा चार वटै विधामा क्रिकेटका खेलाडी र प्रशिक्षक परेका छन् ।
मञ्चले मंगलबार सार्वजनिक गरेको उत्कृष्ट पुरुष खेलाडीमा क्रिकेट टिमका कप्तान पारस खड्का र सोमपाल कामी, प्याराग्लाइडिङका युकेश गुरुङ, गल्फका शुक्रबहादुर राई र जुडोका इन्द्रबहादुर श्रेष्ठ मनोनयनमा परेका छन् ।
यस्तै महिला तर्फको उत्कृष्ट खेलाडीको मनोनयनमा फुटबलकी सावित्रा भण्डारी, भलिबलकी सरस्वती चौधरी, क्रिकेटकी सिता रानामगर, जुडोकी मनिता श्रेष्ठ प्रधान र तेक्वान्दोकी निमा गुरुङ रहेका छन् ।
यसैगरी उत्कृष्ट युवा पुरुष खेलाडीमा ब्याटमिन्टनका प्रिन्स दाहाल, एथ्लेटिक्सका अजित कुमार यादव, क्रिकेटका ललितनारायण राजवंशी, फुटबलकी मञ्जली कुमारी योञ्जन र कराँतेका विजय श्रेष्ठ मनोनयनमा परेका छन् ।
उत्कृष्ट प्रशिक्षकमा प्याराग्लाईडिङका योगश भट्टराई, क्रिकेटका जगत टमाटा, एथ्लेटिक्सका धनीराम चौधरी, भलिबलका ज्ञानेन्द्र विष्ट र फुटबलका हरि खड्का मनोनयनमा छन् ।
खेलकुद पत्रकार मञ्चले आयोजना गर्ने यो अवार्ड असार १७ गते प्रदान गरिने बताइएको छ ।