कृषि उपज बजार निर्माण गर्न मउवासंघको माग

३० मंसिर, हेटौँडा । मकवानपुर उद्योग बाणिज्य संघले कृषि विकास राज्यमन्त्री राधिका तामाङसँग हेटौंडामा क्षेत्रीयस्तरको कृषिउपज थोक बजार निर्माण गर्न माग गरेको छ । संघको नेतृत्वमा कृषि विकास मन्त्रालयमा पुगि स्थानीय सरोकार तथा राजनैतिक दलको प्रतिनिधिसहितको टोलीले राज्यमन्त्री राधिका तामाङसँग थोक बजार निर्माणका लागि ध्यानाकर्षण गराएको हो । 
हेटौंडा उपमहानगरपालिका वडा नम्बर ११ स्थित राप्ति किनारमा रहेको सरकारी स्वामित्वको जग्गालाई हेटौंडा उपमहानगरपालिकाले समेत बजार निर्माणमा लिखित रुपमै स्वीकृत दिएपछि काठमाडौंमा पुगेर कृषि उपज निर्माणका लागि ध्यानाकर्षण गराएको अध्यक्ष राजकुमार न्यौपानेले बताए । भेटमा राज्यमन्त्री तामाङले आफूले समेत उक्त स्थानको केही दिन अघि अवलोकन गरिसकेकोले यस विषयमा आफू सकारात्मक रहेको बताए । 
कृषि उपज बजार व्यवस्थापन समितिका गोविन्द दहालले बुटबल र सर्लाहीको बीचमा पूर्वपश्चिम राजमार्गमा कतै पनि यस्तो बजार नरहेकोले यसका लागि हेटौंडा राम्रो विकल्पको रुपमा रहेको बताए । भेटका अवसरमा कृषि सहकारीका एकराज उप्रेतीले चितवन, बारा, पर्सा, रौतहट, सिन्धुली लगायत मकवानपुर जिल्लाका समेत गरी करीब ५ हजार कृषकले प्रत्यक्ष लाभ लिन सक्ने जानकारी दिएका थिए । 
कार्यक्रममा हेटौँडा नगरपालिकाका विके महर्जन, मकवानपुर तरकारी तथा फलफूल व्यवसायी संघका अध्यक्ष खड्गबहादुर मोक्तान, एमालेबाट ध्रुब चौलागाई, नेपाली काँग्रेसकी कृषि संयोजक लक्ष्मी गौतम, राप्रपाका उपाध्यक्ष गुञ्जन न्यौपाने, सीताराम बर्तौला लगायतको उपस्थिति रहेको थियो ।